नक्कली डाक्टर श्याम टण्डनविरुद्ध फौजदारी अभियोग

२ साउन, काठमाडौं । नक्कली शैक्षिक प्रमाणपत्र पेस गरी विदेशमा एमबीबीएस अध्ययन गरेका श्याम टण्डनविरुद्ध सरकारी वकिलको कार्यालय, काठमाडौंले फौजदारी अभियोग दायर गरेको छ ।

रुपन्देहीको शुद्धोधन गाउँपालिका-३ का ३६ वर्षीय टण्डनले उच्च माध्यमिक तहको प्रमाणपत्र कीर्ते गरी बंगलादेशमा एमबीबीएस अध्ययन गरेका थिए ।

प्रमाणपत्र नक्कली भएको पुष्टि भएपछि प्रहरीको केन्द्रीय अनुसन्धान ब्युरो (सीआईबी)ले अनुसन्धान अघि बढाएको थियो ।

बंगलादेशमा एमबीबीएस अध्ययन गर्न टण्डनले नेपाल मेडिकल काउन्सिलबाट एलिजिबिलिटी (अनुमति प्रमाणपत्र) प्राप्त गरेका थिए । सो प्रमाणपत्र लिनका लागि उनले उच्च माध्यमिक शिक्षा बोर्डबाट जारी भएको ट्रान्सक्रिप्ट कीर्ते गरी पेस गरेका थिए ।

यो पनि पढ्नुहोस

मेडिकल काउन्सिलको लेटरप्याड दुरुपयोग गरी डाक्टरी लाइसेन्स परीक्षा पास

बंगालादेशमा एमबीबीएस अध्ययन गर्ने प्रयोजनका लागि २०६६ सालमा कक्षा ११ र १२ पास भएको शैक्षिक प्रमाणपत्रमा कक्षा १२ मा पाएको नम्बर परिवर्तन गरेका थिए । विषयगत अंकहरू हेरफेर गरी प्रमाणपत्र बनाइएको देखिएको छ ।

राष्ट्रिय परीक्षा बोर्ड, भक्तपुरबाट प्राप्त जानकारीअनुसार टण्डनले कक्षा १२ मा अंग्रेजी विषयमा ५२ अंक पाएकोमा ८५ अंक बनाइएको थियो । यस्तै, भौतिकशास्त्रमा ३१ अंकलाई ६८ बनाइएको, रसायनशास्त्रमा २० अंकलाई ६९ र जीव विज्ञानमा ३८ अंकलाई ४१ अंक बनाइएको देखिएको छ ।

उनले रजिस्ट्रेसन नम्बर ६५४९२००८७ भएको प्रमाणपत्र कीर्ते गरेका थिए ।

बोर्डद्वारा ‘नक्कली’ ठहर

राष्ट्रिय परीक्षा बोर्डले टण्डनको प्रमाणपत्र नक्कली रहेको उल्लेख गर्दै सीआईबीलाई आधिकारिक पत्र पठाएको थियो । प्रमाणपत्रका आधारमा टण्डनले सन् २००९ मा एमबीबीएस अध्ययनका लागि नेपाल मेडिकल काउन्सिलबाट एलिजिबिलिटी सर्टिफिकेट लिएका थिए ।

काउन्सिलमा कीर्ते प्रमाणपत्र पेस गरी सरकारी निकायको अभिलेखमा झुटा विवरण राखिएको पाइएपछि सीआईबीले उनलाई मुलुकी अपराध संहिताअनुसार कीर्ते कागजातसम्बन्धी कसुरमा अनुसन्धान अघि बढाएको हो ।

गुल्मी र रुपन्देहीस्थित टण्डनको स्थायी र अस्थायी बसोबास गरेको घरमा प्रहरीले खानतलासी गर्दा कीर्ते प्रमाणसँग जोडिने भौतिक प्रमाण भने फेला परेन । यद्यपि, अनुसन्धानमा प्राप्त कागजातहरू पर्याप्त प्रमाणस्वरूप प्रस्तुत गरिएको सरकारी वकिलको कार्यालयले जनाएको छ ।

हाल फरार रहेका टण्डनविरुद्ध मुलुकी अपराधसंहिता २०७४ को दफा २७६ (कीर्ते) र मुलुकी ऐन २०२० अन्तर्गतका विभिन्न दफाबमोजिम मुद्दा दर्ता गरिएको छ । टण्डनलाई सरकारी लिखित कीर्ते गर्नेलाई ७ वर्षसम्म कैद र ७० हजार जरिवानाको माग गरिएको छ ।

सरकारी वकिल कार्यालय, काठमाडौंले उनलाई पक्राउ गर्न काठमाडौं जिल्ला अदालतबाट पुर्जी जारी गर्न अनुरोध गर्दै अभियोगपत्र पेस गरेको हो ।