रास्वपाको प्राइमरी इलेक्सनमा १५९४ मत खस्यो

१३ भदौ, बुटवल । रुपन्देही–३ को १७ कात्तिकमा हुने उपचुनावमा राष्ट्रिय स्वतन्त्र पार्टी रास्वपाका ९ जना आकांक्षीबीच भएको प्रारम्भिक निर्वाचनमा १५९४ मत खसेको छ ।

पार्टीले ९ जना आकांक्षीबाट एकजना उम्मेदवार छनोट गर्न बिहीबारदेखि प्राइमरी इलेक्सन सुरु गरेको थियो । बिहीबार बिहान ७ बजेबाट आज शुक्रबार सांझ ७ बजेसम्म भएको अनलाइन भोटिङमा केन्द्रीय समिति सदस्य बाहेकको २७१६ मतमध्ये १५६७ मत खसेको छ ।

यस्तै, ६२ जना केन्द्रीय समिति सदस्यहरू मध्येबाट २७ मत खसेको छ ।

‘खसेका मतहरूमध्ये कति भ्यालिड छन् कति इन्भ्यालिड छन् त्यो भने चेक गर्न बाँकी रहेको पार्टीको निर्वाचन आयोगले भेरिफाई गरेर जानकारी दिने भनेको छ’, पार्टी सहमहामन्त्री विपिनकुमार आचार्यले भने ।

प्राइमरी इलेक्सनमा पार्टीको एपमार्फत मोबाइलबाटै अनलाइन भोटिङ गर्न सकिने व्यवस्था रहेको थियो । उम्मेदवार छनोट विधिअन्तर्गत प्राइमरी इलेक्सनमा पाउने मतको अंक भार सबैभन्दा धेरै ५० रहेकाले यसलाई आकांक्षीहरूले महत्वका साथ हेरेका छन् ।

पार्टीले ७ देखि २१ साउनसम्म उम्मेदवार बन्न आवदेन माग गरेकोमा ९ जना छनोट भएका थिए । जसमा पार्टी केन्द्रीय सदस्य कुसुम महर्जन, रुपन्देही ३ का क्षेत्रीय सभापति मधु अर्याल, अमेरिकाबाट हालै मात्र फर्किएका बुटवल सेमलारका सुलभ खरेल, पार्थिवेन्द्र उपाध्याय, डा. लेखजंग थापा, ज्ञानु पौडेल, कोटहीमाईका जीतबहादुर गुप्ता, रचना क्षेत्री र पुनम कुमारी अग्रवाल छन् । कुसुम, मधु, सुलभ र जितबहादुरबाहेक ५ जना भैरहवाका हुन् ।

प्राइमरी इलेक्सनमा धेरै अन्तरले बढी भोट पाउने आकांक्षी नै उम्मेदवार बन्न सक्छ ।

यसअघि पार्टीले २० अंक भार रहेको पोलिटिकल प्रोक्सिमिटी र २५ अंकभार रहेको लिडरसिप एकेडेमीको लागि आकांक्षीहरूबीच विभिन्न गतिविधि गराएर मूल्याङ्कन गरिसकेको छ । १०० अंकमध्ये ५ अंक समावेशितालाई छुट्याइएको छ । यो अंक महिला, आदिवासी जनजाति, मधेशी, अल्पसंख्यक र पछाडि पारिएको समुदायका आकांक्षीले मात्र पाउँछन् ।

प्राइमरी इलेक्सनमा पार्टीले ‘नन अफ द एबोभ’ माथिका मध्ये कोही पनि हुँदैन भन्ने विकल्पमा पनि भोट दिन सकिने व्यवस्था गरेको छ । यसमा सबैभन्दा बढी आएको खण्डमा पुन: नयाँ प्रक्रियाबाट उम्मेदवार चयन गरिने सहमहामन्त्री आचार्यले जानकारी दिए ।

रास्वपाको प्राइमरी इलेक्सनमा निर्वाचन क्षेत्रका पार्टी सदस्य, तहगत समितिका सदस्य र केन्द्रीय समिति सदस्यतले मतदान गरेका हुन् ।

सम्बन्धित निर्वाचन क्षेत्रका पार्टी सदस्यको मतदानको ८० अंक, क्षेत्रभित्रका मतदाता रहेका पार्टीका तहगत समिति सदस्यको मतदानको १० अंक र केन्द्रीय समिति सदस्यको मतदानको १० अंकभार रहनेछ ।

पार्टी सदस्यको मतदानमा २६ साउनसम्म पार्टी सदस्यता लिएकाले मात्र मतदानमा भाग लिन पाउने व्यवस्था थियो ।

भोलि १४ गते प्राइमरी इलेक्सनको नतिजा, यसअघि सम्पन्न पोलिटिकल प्रोक्सिमिटी र लिडरसिप एकेडेमीको मूल्यांकनबाट प्राप्त अंक र समावेशिताको अंक कम्पाइल गरी भदौ १५ गते सबैभन्दा बढी अंक पाउने एकजनालाई उम्मेदवार घोषणा गरिने सहमहामन्त्री आचार्यले जानकारी दिए ।

गत आमचुनावमा रुपन्देही–३ मा समानुपातिकतर्फ १४ हजार १५४ मत सहित रास्वपा तेस्रो ठूलो दल बनेको थियो । यो चुनावको नतिजाले २०८४ को चुनावलाई प्रभाव पार्ने भएकाल  रास्वपा सहित प्रमुख दलले प्रतिष्ठाको रुपमा लिएका छन् ।