‘नेपालमा लगानीका लागि बृहत अवसर’

News Summary

Generated by OK AI. Editorially reviewed.

लगानी बोर्डका प्रमुख कार्यकारी अधिकृत सुशील ज्ञवालीले नेपालमा ऊर्जा, कृषि, पर्यटन, सूचना प्रविधि, पूर्वाधार लगायत क्षेत्रमा लगानीका लागि बृहत अवसर रहेको बताए।
ज्ञवालीले चिनियाँ लगानीकर्तालाई थप लगानी गर्न आग्रह गर्दै नेपाललाई दक्षिण एसियाको 'गेटवे' बन्न सक्ने बजारको रूपमा उल्लेख गरे।
लगानी बोर्डले वैदेशिक लगानी सहजीकरणका लागि एकद्वार सेवा केन्द्र, द्रुत स्वीकृति र नीतिगत सुधारमा विशेष जोड दिएको जानकारी दिए।

१ पुस, काठमाडौं । लगानी बोर्डका प्रमुख कार्यकारी अधिकृत (सीईओ) सुशील ज्ञवालीले नेपालमा लगानीका लागि बृहत अवसर रहेको बताएका छन् । यस्तो अवसरको फाइदा उठाउन ज्ञवालीले थप लगानी गर्न चिनियाँ लगानीकर्तालाई आग्रह गरे ।

नेपाल–चीन लगानी सम्बन्धी काठमाडौंमा आयोजित कार्यक्रममा सीईओ ज्ञवालीले नेपालमा ऊर्जा, कृषि, पर्यटन, सूचना प्रविधि, पूर्वाधार, सडक, औद्योगिक लगायत क्षेत्रमा लगानीका लागि धेरै सम्भावना रहेको र बजार हिसाबले नेपाल दक्षिण एसियाको ‘गेटवे’ बन्न सक्ने धारणा राखे ।

लगानीका लागि नेपाल आकर्षक गन्तव्य रहेको उल्लेख गर्दै उनले रोजगारी सिर्जना गर्न र दीर्घकालीन साझेदारी निर्माणका लागि पनि चिनियाँ लगानीले सहयोग पुग्ने बताए ।

वैदेशिक लगानी थप सहजीकरण गर्न लगानी बोर्डले एकद्वार सेवा केन्द्र, परियोजना प्रस्तावको द्रुत स्वीकृति, संस्थागत सुदुढीकरण, नीतिगत सुधार लगायतमा विशेष जोड दिएको उल्लेख गरे ।

सीईओ ज्ञवालीले नेपाललाई भरपर्दो, प्रतिस्पर्धी र नवप्रवर्तनमा आधारित लगानी गन्तव्यका रूपमा स्थापित गर्न लगानी बोर्डले काम गरिरहेको जानकारी दिए ।

उनले लगानीका लागि सहजीकरण गर्न र आयोजना कार्यान्वयनका क्रममा आइपर्ने समस्या समाधान गर्न बोर्डले अभिभावकको भूमिका निर्वाह गर्ने पनि बताए ।

नेपालमा चिनियाँ लगानी सम्बन्धी कार्यक्रम चाइनिज जनरल एसोसिएसन अफ इन्डस्ट्रिज एन्ड कमर्स इन नेपाल र नेपाल चेम्बर अफ कमर्स आयोजनामा भएको थियो ।

कार्यक्रममा कृषि, उद्योग, सूचना प्रविधि, निर्माण क्षेत्र, पर्यटन लगायत क्षेत्रमा अनुभव प्राप्त चिनियाँ लगानीकर्ताको सहभागिता थियो ।