नेपालमा ‘धुरन्धर’ को कमाइ साढे ८ करोड, ‘अवतार ३’ को कति छ ?

News Summary

Generated by OK AI. Editorially reviewed.

रणवीर सिंह स्टारर बलिउड फिल्म ‘धुरन्धर’ले नेपालमा १० करोड ग्रस कमाउने सम्भावना देखिएको छ।
‘धुरन्धर’ले बुधबार भारतमा ‘स्त्री २’ लाई उछिन्दै दोस्रो धेरै कमाउने हिन्दी फिल्म बनेको छ।
जेम्स क्यामरुन निर्देशित ‘अवतार : फायर एन्ड यश’ले नेपालमा ३ करोड ८४ लाख ग्रस कमाएको छ।

काठमाडौं । अहिलेकै गति कायम रहे रणवीर सिंह स्टारर बलिउडको जासूस फिल्म ‘धुरन्धर’ ले नेपालमा १० करोड ग्रसको आँकडा पार गर्ने देखिएको छ । विहिबार दिउँसोसम्म फिल्मले सिनेपाः बक्सअफिसमा ८ करोेड ५० लाख कमाएको छ ।

बलियो ‘वर्ड अफ माउथ’ को मद्दतमा क्रिसमस र आउने सप्ताहन्तमा फिल्मले राम्रै कमाइ गर्ने देखिन्छ । यो फिल्म ‘स्त्री २’ लाई उछिन्दै बुधबार भारतमा दोस्रो धेरै कमाउने हिन्दी फिल्म बनिसकेको छ ।

सन् २०२५ मा नेपालमा कमै विदेशी फिल्मले मात्र १० करोडको आँकडा पार गर्न सके । ‘धुरन्धर’ त्यो उपलब्धितर्फ अघि बढेको देखिन्छ ।

‘अवतार ३’ को नेपाल कमाइ ४ करोड नजिक

जेम्स क्यामरुन निर्देशित चर्चित हलिउड फिल्म ‘अवतार : फायर एन्ड यश’ ले विहिबारसम्म नेपालमा ३ करोड ८४ लाख नेरु ग्रस कमाएको छ । क्रिसमस र आउने सप्ताहन्तमा फिल्मको कलेक्सन ४ करोड नाघ्नेछ ।

यो फिल्मले के नेपालमा ५ करोडको लाइफटाइम कलेक्सनको आँकडा पार गर्ला, यो चाहिँ पर्खाइको विषय बन्नसक्छ ।