लेखकसँग जाँचबुझ आयोगले लिएको बयानप्रति ओलीको आपत्ति

News Summary

Generated by OK AI. Editorially reviewed.

नेकपा एमालेका अध्यक्ष केपी शर्मा ओलीले पूर्वगृहमन्त्री रमेश लेखकसँग सरकारद्वारा गठित आयोगले लिएको बयानप्रति आपत्ति जनाउनुभएको छ।
ओलीले आयोगलाई ‘सो कल्ड’ आयोग भन्दै गृहमन्त्रीसँग बयान किन लिएको प्रश्न गर्नुभएको छ।
उनले चुनावी वातावरण नबनेको भन्दै राजनीतिक नेताहरूलाई लखेट्ने काम भइरहेको बताउनुभएको छ।

१५ पुस, काठमाडौं । नेकपा एमालेका अध्यक्ष केपी शर्मा ओलीले पूर्वगृहमन्त्री रमेश लेखकसँग जाँचबुझ आयोगले लिएको बयानप्रति आपत्ति जनाएका छन् ।

एमालेले मंगलबार आयोजना गरेको विचार गोष्ठि सम्बोधनका क्रममा उनले सरकारद्वारा गठित आयोगलाई ‘सो कल्ड’ आयोगको संज्ञा दिँदै आपत्ति जनाएका हुन् ।

‘गृहमन्त्रीजीलाई हिजो सो कल्ड आयोगले बोलाएर बयान लियो । गृहमन्त्रीसँग किन बयान लिएको ?,’ अध्यक्ष ओलीले प्रश्न गरे, ‘मुछ्न खोजेको होइन ? दलहरूलाई बदनाम गर्न खोजेको होइन ? गृहमन्त्रीले त्यहाँ गोली चलाएको थियो ?’

उनले आफूसँग पनि आयोगले बयान लिने हल्ला सुनेको पनि बताए । ‘हल्ला चल्या छ, प्रधानमन्त्रीसँग पनि बयान लिन्छ,’ ओलीले प्रश्न गरे, ‘यो चुनावको वातावरण बनेको हो र ? पासपोर्ट रोक्का, यो तामासा के हो त्यो ?’

एमाले चुनावमा सहभागी हुने भए पनि अहिलेसम्म चुनावी वातावरण बन्न नसकेको उनको भनाइ थियो । ‘हामी चुनावमा सहभागी हुन्छौं,’ ओलीले भने, ‘तर, अहिलेसम्म चुनावी वातावरण बनेको छैन । राजनीतिक नेताहरूलाई लखेट्ने काम भइराखेको छ ।’