सोपान फर्मास्युटिकल्सको नाफा ८२ प्रतिशत घट्यो

२६ भदौ, काठमाडौं । सोपान फर्मास्युटिकल्स लिमिटेडको खुद नाफा एक वर्षमा ८२ प्रतिशतभन्दा बढीले घटेको छ। कम्पनीले सार्वजनिक गरेको आर्थिक वर्ष २०८२/८३ को चौथो त्रैमासिक अपरिष्कृत वित्तीय विवरणअनुसार कम्पनीले ३ करोड ८२ लाख ८९ हजार रुपैयाँ खुद नाफा कमाएको छ।

अघिल्लो आर्थिक वर्षको सोही अवधिमा कम्पनीको खुद नाफा २१ करोड ७७ लाख ९१ हजार रुपैयाँ थियो । यस आधारमा कम्पनीको नाफा ८२.४२ प्रतिशत घटेको हो। सञ्चालन आम्दानीमा सामान्य वृद्धि भए पनि अन्य आम्दानी घट्नु तथा बिक्री–वितरण र प्रशासनिक खर्च बढ्नुले कम्पनीको नाफामा दबाब परेको कम्पनीको भनाइ छ ।

कम्पनीको सञ्चालन आम्दानी ५० करोड ५ लाख रुपैयाँबाट बढेर ५१ करोड १४ लाख रुपैयाँ पुगेको छ । यो करिब २.१८ प्रतिशतको वृद्धि हो।तर, अन्य आम्दानी १ करोड ५७ लाख रुपैयाँबाट घटेर १२ लाख ३३ हजार रुपैयाँमा सीमित भएको छ । अन्य आम्दानीमा करिब ९२ प्रतिशत गिरावट आएको हो।

समीक्षा अवधिमा कम्पनीको वित्तीय खर्च भने घटेको छ । अघिल्लो आर्थिक वर्षमा ५ करोड ६८ लाख रुपैयाँ रहेको वित्तीय खर्च घटेर ४ करोड ३९ लाख रुपैयाँमा झरेको छ। वित्तीय खर्च घटे पनि सञ्चालन खर्च बढेको देखिएको छ। कम्पनीको बिक्री तथा वितरण खर्च ४ करोड ७ लाख रुपैयाँबाट बढेर ६ करोड ४४ लाख रुपैयाँ पुगेको छ। यो करिब ५८ प्रतिशतको वृद्धि हो।

त्यस्तै, प्रशासनिक खर्च ४ करोड २७ लाख रुपैयाँबाट बढेर ६ करोड २० लाख रुपैयाँ पुगेको छ। प्रशासनिक खर्च करिब ४५ प्रतिशत बढेको हो। यसरी आम्दानीमा सामान्य वृद्धि भए पनि अन्य आम्दानीमा आएको ठूलो गिरावट र सञ्चालन खर्चमा भएको वृद्धिले कम्पनीको नाफा उल्लेख्य रूपमा घटाएको देखिन्छ।

नाफासँगै कम्पनीको प्रतिसेयर आम्दानी (ईपीएस) पनि उल्लेख्य रूपमा घटेको छ । अघिल्लो आर्थिक वर्षमा १८ रुपैयाँ ३३ पैसा रहेको ईपीएस समीक्षा अवधिमा २ रुपैयाँ २३ पैसामा झरेको छ। यो करिब ८७.८३ प्रतिशतको गिरावट हो।

समीक्षा अवधिको अन्त्यसम्म कम्पनीको प्रतिसेयर नेटवर्थ ९६ रुपैयाँ ३४ पैसा र प्रतिसेयर कुल सम्पत्तिको मूल्य १५७ रुपैयाँ ८२ पैसा रहेको छ।

कम्पनीको जगेडा तथा सञ्चित कोषमा ३६ करोड ७३ लाख रुपैयाँ रहेको वित्तीय विवरणमा उल्लेख छ।