२०८२ वैशाख २२ गते ०:३९ 
२१ बैशाख, काठमाडौं । इंग्लिस फरवार्ड ह्यारी केनले आफ्नो करियरकै पहिलो उपाधिको रुपमा जर्मन बुण्डेसलिगाको उपाधि जितेका छन् ।
बायर्न म्युनिखले आइतबार बुण्डेसलिगाको उपाधि पक्का गर्दा केनले करियरको पहिलो उपाधि स्वाद चाख्न पाए ।
आफ्नो क्लब करियरमा १५ वर्ष खेलिसकेका इंग्ल्याण्डका कप्तान केनले अहिलेसम्म कुनै उपाधि जित्न सकेका थिएनन् । उपाधिकै खोजीमा इंग्लिस क्लब टोटनहमबाट सन् २०२३ मा जर्मन महारथी बायर्न म्युनिख पुगेपनि उनले त्यहाँ उपाधि जित्न दुई वर्ष कुर्नुपर्यो ।
केनले सन् २०१८-१९ सिजन टोटनहमबाट युरोपियन च्याम्पियन्स लिग फाइनल खेलेपनि उपाधि जित्न सकेनन् । केनले क्लब र राष्ट्रका लागि गरी ६९४ खेलपछि उपाधि खडेरी तोडेका हुन् ।
बुण्डेसलिगाको दोस्रो स्थानमा रहेको बायर लेभरकुजन फ्रेएवर्गसँग २-२ गोलको बराबरीमा रोकिएपछि बायर्नले ३४औं पटक लिग उपाधि जितेको हो ।
अघिल्लोदिन लाइपजिगसँग ३-३ को बराबरी खेलेपछि बायर्नले उपाधिका लागि पर्खनुपरेको थियो । तर दोस्रो स्थानको लेभरकुजनले पनि जित निकाल्न नसकेपछि बायर्न आफ्नो खेल नभएपछि आइतबारै च्याम्पियन बनेको हो ।
बायर्नको ३२ खेलबाट ७६ अंक छ भने समान खेलबाट लेभरकुजनको ६८ अंक छ । अब लिगमा दुई खेल मात्र बाँकी रहँदा बायर्नले दुवै खेल हारेपनि लेभरकुजनले भेट्ने छैन ।
प्रतिक्रिया 4