२०८२ वैशाख ३१ गते २१:०२ 
३१ वैशाख, काठमाडौं । अष्ट्रेलियाका ब्याटर जेक फ्रेजर-मेगर्क आईपीएलको बाँकी खेलका लागि नफर्कने भएका छन् । दिल्ली क्यापिटल्सले उनको स्थानमा बंगलादेशका पेस बलर मुस्ताफिजुर रहमानलाई टोलीमा भित्र्याएको छ।
भारत-पाकिस्तानबीचको सीमा तनावका कारण एक हप्ताको लागि स्थगित भएको आईपीएल २०२५ पछि फ्रेजर-मेगर्कले बाँकी सिजन नखेल्ने निर्णय गरेका थिए।
दिल्ली क्यापिटल्सले मुस्ताफिजुरलाई ६ करोड भारतीय रुपैयाँमा अनुबन्ध गरेको हो। मुस्ताफिजुरले आईपीएलमा हालसम्म ५७ खेल खेलेका छन् र ६१ विकेट लिएका छन्। तीमध्ये १० खेल उनले २०२२ र २०२३ सिजनमा दिल्ली क्यापिटल्सकै लागि खेलेका थिए।
दिल्लीले अर्का अस्ट्रेलियन मिचेल स्टार्क र दक्षिण अफ्रिकाका फाफ डुप्लेसी र ट्रिस्टन स्टब्सको भने अझै निर्णय पर्खिरहेको छ ।
हालै संशोधित आईपीएल नियम अनुसार, अन्तिम चरणका लागि टोलीहरूले अस्थायी प्रतिस्थापन खेलाडी साइन गर्न पाउनेछन। तर, यी खेलाडीहरू आगामी सिजनको लागि रिटेन्सन योग्य हुने छैनन्। उनीहरूलाई २०२६ को आईपीएल अक्सनमा दर्ता हुनैपर्नेछ।
प्रतिक्रिया 4