अमेरिकी रियलस्टेटमा जितमानको छलाङ

रुमानी सपना पछ्याएर अमेरिका छिर्दा सोलुखुम्बु लिखुपिकेका जितमान बस्नेतको ठूलो सपना थिएन । सामान्य केही गरेर परिवारलाई सुखसँग पाल्ने । अमेरिकाको राजधानी वासिंटन डिसीमा केही समय बिताएर उनी नर्थ क्यारोलिना झरेका थिए । उनले ३÷४ वर्ष यता पाएको सफलता धेरै नेपालीका लागि प्रेरणादायी छ । यहाँ आएको केही वर्षपछि जीवनको अध्यायले नयाँ मोड लियो । घरजग्गा कारोबार (रियलस्टेट)को क्षेत्रमा छोटो अवधिमै हात पारेको सफलता निकै लोभ लाग्दो छ ।

यसै वर्षमात्र अमेरिकाको टेक्सासमा उनले ‘युनाइटेड इस्टेट इलाइट अवार्ड’ हात पारे । बहुराष्ट्रिय कम्पनी युनाइटेड रियल स्टेटले टेक्सासको ड्यालसमा आयोजना गरेको एक समारोहबीच उनलाई सम्मान गरिएको थियो ।

यो सम्मान पाउने जितमान पहिलो नेपाली हुन् । उनी अमेरिकाका २५ हजार रियल्टर मध्येबाट सम्मानका लागि छनोटमा परेका थिए । सो कार्यक्रममा नर्थक्यारोलिना राज्यबाट जितमान छानिएका थिए । युनाइटेड इस्टेट एलाइट अवार्ड हात पार्दाको क्षण उनको केवल व्यक्तिगत विजय मात्र थिएन नेपाली समुदायकै गौरवको क्षण थियो ।

विगत ४ वर्षदेखि निरन्तर नर्थ क्यारोलिनामा उत्कृष्ट रियल्टरको अवार्ड पाउँदै आएका जितमान इलाइट अवार्ड प्राप्त गर्ने नर्थ क्यारोलिना राज्यकै पहिलो रियल्टर पनि हुन । ‘म सम्पूर्ण रूपमा मन, वचन र कर्मले यही क्षेत्रमा प्रतिबद्ध भएर लागेकाले यस क्षेत्रमा राम्रो गर्न सके जस्तो लाग्छ’ बस्नेत भन्छन्, ‘निरन्तर मेहनत, ग्राहकको विश्वास, समुदायको साथकै कारण म यहाँ पुगेको हुँ ।’ सोही समारोहमा उनले मिलिनियम क्लब अवार्ड र टप एजेन्ट सेल्स भोलुम गरी तीन अवार्ड प्राप्त गरेका थिए ।

त्यसो त सन् २०२४ वर्ष उत्कृट रियल्टरको अवार्ड यही ४ मार्चमा रालेमा सम्पन्न एक समारोहबीच जितमानले थापे । मिलेनियम क्लब एलाइट अवार्ड २०२४, टप एजेन्ट अवार्ड ट्रान्ज्याक्सन २०२४, टप एजेन्ट अवार्ड सेल्स भोल्युम २०२४ गरी ३ वटै विधाका अवार्ड आफ्नो पोल्टामा पारेका थिए बस्नेतले । रालेको युनाइटेट रियलस्टेट ट्रयांगल नामक कम्पनीमा आबद्ध भएर काम गरिरहेका बस्नेतसँगै यस कम्पनी अन्तर्गत २५ हजार रियल स्टेट एजेन्ट छन् ।

२०२२, २०२३ र २०२४ तीनै वर्ष उनले आफ्नै कम्पनीभित्र सबैभन्दा धेरै कारोबार गर्ने श्रेष्ठ एजेन्टको उपाधि लगातार जित्दै अभूतपूर्व कीर्तिमान स्थापित गरे ।

‘हामी बाहिरको मान्छे यहाँका भन्दा बढी किनबेचमा संलग्न हुनु नै सफलताको रूपमा लिन्छु’ उनले सुनाए । अमेरिकामा करिब ४५० भन्दा बढी नेपाली तथा नेपालीभाषीहरू रियल्टरको रूपमा काम गर्दै आएको अनुमान छ । कतिपयले भने आफ्नै रियल स्टेटको ब्रोकरेज कम्पनी स्थापना गरेर कारोबार गरिरहेका छन् ।

नेपालमा घर जग्गा कारोवार गर्नेलाई हेर्ने दृष्टिकोण अलग छ । जो कोही पनि यसमा लाग्न सक्छ । अमेरिकामा भने यो पेशा प्रतिष्ठत मानिन्छ । सम्बन्धित कोर्ष पढेर लाइसेन्स निकालेर मात्र यस क्षेत्रमा काम गर्न पाइन्छ । जो कोहीले रहर गर्दैमा यसमा संलग्न हुन पाउँदैनन् ।

एकै दिनमा ४ वटासम्म घर किनबेच गरेका जितमान आफ्नो पूर्णकालीन पेशा रियलस्टेट भएको बताउछन् । ‘पेशा नै यही भएपछि पूर्णत प्रतिबद्ध भएर उत्कृष्ट गर्न कोसिस गर्नु नै पर्‍र्यो’ बस्नेत भन्छन् । उनी महिनामा औषत १० वटा घर किनबेच गर्छन् । यो आँकडा त्यति सहज होइन । यहाँका व्यस्त अमेरिन रियल्टरले पनि यति ठूलो संख्यामा घर किनबेचको कारोबार बिरलै गर्छन् । हालसम्म लगभग ४५० घर किनबेच गरिसकेका छन् बस्नेतले ।

नर्थ क्यारोलिनाको नेपाली समुदायमा उनले आफ्नो नाम यसरी बनाएका छन् कि, घर किनबेच भन्नेबित्तिकै धेरैको मानसपटलमा उनकै नाम आउँछ । सोसल मिडियाका कारण यो राज्यबाहिर उनलाई खोज्दै घर किन्ने हरूको संख्या पनि उत्तिकै छ ।

अमेरिकामा रहेका धेरै नेपालीहरूको गन्तव्य बनिरहेको छ नर्थ क्यारोलिना । यो ठाउमा सर्नुअघि क्यालिफोर्नियादेखि टेक्सास, बोस्टन, न्यूयोर्कदेखि मिन्नेसोटा, भर्जिनिया लगायत अमेरिकाका धेरै राज्यबाट यहाँ सर्नेहरूले अधिकांशले घर किन्दा जितमानको सल्लाह लिन्छन् ।

‘घर किनबेचमा जितमानले मारेको छलाङ साँच्चै नै अनुकरणीय छ’ न्युर्योकबाट नर्थक्यारोलिनाको राले सरेका कर्मा शेर्पा भन्छन्, ‘घर कारोबारमा कहलिएका, अनुभवी, हरेक कुरामा सहयोग गर्ने स्वभावका कारण जितमान यो क्षेत्रमा चम्किएका हुन् ।’

उनको सामाजिक काम तथा पेशामा अब्बल भएकै कारण मान्छेहरू खोजी खोजी आउने गर्छन् ।

अमेरिकाको पूर्व तिरका राज्यमा सबै भन्दा राम्रो मौसम नर्थ क्यालोराइनमा मानिन्छ । अमेरिकाका सबै जसो उत्तरी राज्यमा हिउँको कारण ३÷४ महिना जनजीवन कष्टकर हुने गर्छ । मौसम राम्रो भएकै कारण यहाँ सरेर आउनेको संख्या बढ्दो छ । केही वर्षको अन्तरालमा फाट्टफुट्ट बाहेक हिउँ नपर्ने राले क्षेत्र क्यालिफोर्निया पछिको राम्रो मौसम मानिन्छ । यो राले डुरम क्षेत्रमा रहेको रिसर्च ट्रयाङगल पार्क (आरटीपी)को कारण पनि राले क्षेत्रमा धेरै नेपालीको आकर्षण देखिन्छ । यहाँ एकै ठाउँमा ३७० भन्दा बढी अनुसन्धान तथा धेरै उच्च प्रविधि कम्पनीहरू छन् । जहाँ ६५ हजार हाराहारीले काम गर्छन् । यो क्षेत्र अमेरिकाको आइटीको केन्द्र नै मानिन्छ ।

त्यसो त ड्युक युर्निभर्सिटी, एनसी स्टेट युर्निभर्सिटी, युर्निभर्सिटी अफ नर्थ क्यारोलिना जस्ता कहलिएका विश्वविधालय भएका कारण धेरै नेपाली विद्यार्थीको गन्तव्य बन्दै आएको छ यो क्षेत्र । यहाँ नेपालीको संख्या गएको ५÷७ वर्षमा ह्वात्तै बढेको छ । यही कारण पनि जितमानको पेशा फस्टाउन निकै मद्दत पुगेको छ ।

राले नजिकैको केरी शहरमा बसोबास गर्दै आएका बस्नेतले केरी, मोरिसभिल, एपेक्स, होलि स्प्रिङ, फ्युके भरिना, गार्नर, वेक फरेस्ट, डुरम, वेन्डल, नाइट्डेल, न्यु हिल मा धेरै नेपाली परिवारलाई बसोबास गराएका छन् । अहिले रालेमा मात्र १५÷१६ हजार नेपाली रहेको अनुमान गरिन्छ ।

नर्थ क्यारोलिनामा भने नेपाली र नेपाली भाषी गरी ३० देखि ३५ हजारको संख्या रहेको अनुमान छ । रालेपछि सार्लोट, ग्रीन्सबोरो, हाइपइन्टमा नेपालीको संख्या ठूलो छ । पछिल्ला वर्षहरू गाउँगाउँमा नेपाली पुगेका छन् ।

विगत कुनै समय पत्रकारिता तथा वकातल गर्थे जितमान । सगरमाथा टाइम्स पत्रिकामा सम्पादकीय नेतृत्वमा थिए भने मानव अधिकारीवादी वकिलको रूपमा नेपालमा डेढ दशक वकालत गरेका थिए । माओवादी द्धन्द तथा राजाको प्रत्यक्ष शासनका बेला पत्रिकामा सम्पादकीय लेखेको तथा माओवादीलाई सहयोग गरेको भन्दै सेनाले २५८ दिनसम्म भैरवनाथ गणको हिरासतमा राखेको थियो । सेनाको हिरासतबाट छुटेपछि उनी विदेशिएका हुन् ।

हिरासतभित्र पाएको यातनाको विषयमा उनले विषयमा पुस्तक समेत लेखेका छन् । जितमानको यो पुस्तकमाथि बधशाला नामक चलचित्र समेत बनेको छ । उनले विगत ३ वर्षदेखि मेची-महाकाली सेतो छडी अभियानमार्फत नेपालमा दृष्टिविहीनलाई निःशुल्क आवश्यक सामग्री उपलब्ध गराउँदै आएका छन् ।