अमरेशले ‘सैन्यीकरण’ भन्दा संसदीय समितिमा वादविवाद, रमेश प्रसाईंले गरे क्षमायाचना

News Summary

Generated by OK AI. Editorially reviewed.

प्रतिनिधिसभाको राज्य व्यवस्था तथा सुशासन समितिमा ‘राष्ट्रिय सेवा दल विधेयक, २०८३’ माथिको छलफलका क्रममा सांसदहरूबीच विवाद भएको छ ।
सांसद डा. अमरेशकुमार सिंहले प्रयोग गरेको ‘सैन्यीकरण’ शब्दमा सांसद रमेश प्रसाईंले असहमति जनाएपछि समितिमा वादविवाद सिर्जना भएको थियो ।
सभापति हरि ढकालको सहजीकरणपछि सांसद प्रसाईंले आफ्ना अग्रज सांसद सिंहसँग क्षमायाचना गरेका छन् ।

२१ साउन, काठमाडौं । बिहीबार दिउँसो प्रतिनिधिसभा अन्तर्गतको राज्य व्यवस्था तथा सुशासन समितिको बैठक बसेको थियो ।

बैठकमा ‘राष्ट्रिय सेवा दल विधेयक, २०८३’ माथिको सैद्धान्तिक छलफल चलिरहेको थियो ।

छलफलकै क्रममा रास्वपा सांसद डा. अमरेशकुमार सिंहले आफ्नो धारणा राख्ने क्रममा ‘सैन्यीकरण’ भन्ने शब्द प्रयोग गरे ।

उनको उक्त शब्दप्रति रास्वपाकै अर्का सांसद रमेश प्रसाईंले असहमति जनाए । सिंहको भनाइलाई प्रसाईंले खण्डन गरेपछि सिंहको आपत्ति थियो ।

सिंहको आपत्तिपछि समिति सभापति हरि ढकालले सहजीकरणको प्रयास गरे । ‘माननीय रमेशले व्यक्ति तोकेर कतै खण्डन गरेको जस्तो मैले अनुभूति गरेको छैन,’ उनले भने ।

लगत्तै सांसद सिंहले भन्न थाले, ‘मैले मिलिटराइजेशन (सैन्यीकरण) भनेको थिएँ, किन भनेको छैन ? मलाई बच्चा नठान्नु न सभापतिजी ।’

उनले सेना र प्रहरी कति छ भन्ने कुरा प्रमाणित गर्न भन्दै एकछिन आक्रोश पोखे ।

त्यसपछि सांसद प्रसाईंले क्षमायाचना गरे । ‘सभापतिज्यू म अग्रज माननीयज्यूसँग क्षमायाचना गर्छु,’ प्रसाईंले भने ।

सभापति ढकालले लगत्तै खण्डन र वादविवादको थलो समितिलाई नबनाउन आग्रह गरे ।

संसदीय समितिमा सांसदहरूले राखेका विचारलाई व्यक्तिगत रूपमा खण्डन गर्ने प्रवृत्तिले समितिको गरिमा र कार्यसम्पादनमा असर पुग्ने सांसद सिंहको तर्क थियो ।

आपत्ति जनाउँदै के भनेका थिए अमरेशले ?

समितिमा एक–अर्काको कुरा खण्डन गरेर समय व्यतीत गर्ने हो भने कुनैपनि काम अगाडि बढ्न सक्दैन । समितिको आफ्नै मर्यादा हुन्छ, त्यसैले यसलाई वादविवादको थलो बनाइनु हुँदैन । माननीय सदस्यहरूले आफ्नो धारणा स्वतन्त्र रूपमा राख्ने अधिकार राख्नुहुन्छ । समितिमा प्रत्येक सदस्यले आफ्नो विचार प्रश्तुत गर्ने हो, तर एकअर्काको अभिव्यक्तिको खण्डनमै समय खर्च गर्नु उपयुक्त हुँदैन । म सभापतिज्यूलाई पनि यही अनुरोध गर्न चाहन्छु कि समितिको छलफललाई रचनात्मक र विषयकेन्द्रित बनाइयोस् । हामी नयाँ समितिमा पहिलो पटक आएका होइनौं । मलाई लागेको कुरा म राख्छु, उहाँलाई लागेको कुरा उहाँले राख्नुहुन्छ । तर एकअर्काको भनाइको निरन्तर खण्डन गर्न थाल्यौँ भने समितिको छलफल प्रभावकारी रूपमा अघि बढ्न सक्दैन । समितिको आफ्नै गरिमा, मर्यादा र कार्यपद्धति हुन्छ । त्यसैले सबै सदस्यले एकअर्काको विचारको सम्मान गर्दै विषयवस्तुमा केन्द्रित भएर छलफल गर्नु नै उपयुक्त हुन्छ ।