ए डिभिजन लिगमा त्रिभुवन आर्मीको दोस्रो जित

११ पुस, काठमाडौं । विभागीय टोली त्रिभुवन आर्मी क्लबले सहिद स्मारक ए डिभिजन लिगमा दोस्रो जित हात पारेको छ ।

एन्फा कम्प्लेक्स सातदोबाटोमा शुक्रबार भएको खेलमा आर्मीले हिमालयन शेर्पालाई २-० ले पराजित गरेको हो ।

पहिलो हाफमा शेर्पाले आर्मीलाई गोलरहित बराबरीमा रोकेपनि दोस्रो हाफमा आर्मीले दुई गोल गरेको हो ।

आर्मीका लागि कप्तान भरत खवास र टेक बहादुर बुढाथोकीले गोल गरे ।

यस सिजनमा दोस्रो जितपछि ३ खेलबाट ६ अंक जोडदै आर्मी तेस्रो स्थानमा उक्लेको छ । पहिलो खेलमा फ्रेण्ड्सलाई पराजित गरेको आर्मी दोस्रो खेलमा मनाङ मर्स्याङ्दी क्लबसँग पराजित भएको थियो ।

हिमालयन शेर्पाको भने यो पहिलो हार हो । यसअघि शेर्पाले दुई विभागीय क्लब नेपाल पुलिस र एपिएफसँग बराबरी खेलेको थियो । ३ खेलबाट शेर्पाको २ अंक मात्र छ ।