१३ वैशाख, गोर्खा । वैशाख १२ को विनाशकारी भूकम्पको केन्द्र बनेको गोर्खाको लाप्राक अब एकीकृत नमूना बस्तीको केन्द्र बन्ने आशा जागेको छ ।
लाप्राकमा क्षतिग्रस्त भौतिक संरचनाहरुको पुनर्निर्माण र नमूना बस्ती निर्माणका लागि नेपाल सरकार र गैरआवासीय नेपाली संघ (एनआरएन)बीच सम्झौता भएको छ ।
यस सम्झौताले दैनिकी कष्टकर भए पनि लाप्राकवासीको अनुहारमा हाँसो देखिन थालेको छ । आइतबार राष्ट्रपति विद्यादेवी भण्डारी, एनआरएन अध्यक्ष शेष घले, राष्ट्रिय पुनर्निर्माण प्राधिकरणका प्रमुख कार्यकारी अधिकृत सुशील ज्ञवालीलगायतले लाप्राकमा पाइला टेके । एक वर्षसम्म पुनर्निर्माणको पर्खाइमा कष्टकर दिन गुजारेका लाप्राकबासी अब भने छिट्टै भूकम्प प्रतिरोधी नमूना गाउँका बासिन्दा बन्न पाउने खबरले हर्षित छन् ।
स्थानीय ७६ वर्षीया दमिनी गुरुङ भन्छिन्, ‘अब चाहिँ पक्कै घर बन्छ । एकदम धेरै आशिर्वाद छ घर बनाइदिने नानीहरुलाई ।’
एकीकृत नमूना बस्ती निर्माणको जिम्मा एनआरएनले पाएको छ । एनआरएन अध्यक्ष शेष घलेका अनुसार यस वर्षको जाडो महिना अघि नै एकीकृत बस्ती निर्माण भइसक्नेछ ।