२५ कात्तिक, गोरखा । गोरखाको गण्डकी गाउँपालिका–७ ज्यामिरेमा आगलागीबाट दुई घर जलेका छन् । स्थानीय दिपक रेग्मी र निर्मला रेग्मीको घर जलेर नष्ट भएको प्रहरीले जनाएको छ ।
दीपकको ढुंगामाटोले बनेको तीन तले घरसँगै नगद एक लाख पचास हजार, लत्ता कपडा तथा भाँडाबर्तन समेत जलेर नष्ट भएको छ । दीपकको घरमा लागेको आगोबाट करिब दश लाख मूल्य बराबरको क्षति भएको प्रहरीको अनुमान छ ।
त्यस्तै निर्मलाको एक तले घरभित्र रहेको नगद ८० हजार, ६ तोला सुनसँगै लत्ताकपडा, भाँडाबर्तन तथा अन्नपात जलेर नष्ट भएको बताइएको छ । पीडित परिवारको भनाइअनुसार निर्मलाको घरमा लागेको आगोबाट सात लाखभन्दा बढीको क्षति पुगेको अनुमान गरिएको छ ।
शुक्रबार साँझ आगलागी भएपनि शनिवार बिहान मात्र स्थानीयले प्रहरीलाई खबर गरेका थिए । खबर पाएसँगै प्रहरी चौकी घ्याल्चोकबाट प्रहरी टोली खटिएको थियो । शुक्रबार साँझबाट लागेको आगो शनिबार दिउँसो एक बजे मात्र नियन्त्रणमा आएको थियो । प्रहरी र स्थानीयबासी मिलेर आगो निभाएका थिए ।
