२७ बैशाख, रूपन्देही । कपिलवस्तुमा फेला परेका थप तीन जना कोरोना संक्रमित युवाहरू यसअघि मुम्बईबाट आएका दुई जना संक्रमितहरूसँगै लुकिछिपी नेपाल प्रवेश गरेको खुलेको छ ।
उनीहरू पाँचै जना यही वैशाख २४ गते राति लुकिछिपी नेपाल प्रवेश गरेको खुलेको छ । प्रमुख जिल्ला अधिकारी दीर्घनारायण पौडेलका अनुसार रातको समयमा नेपाल प्रवेश गरेका उनीहरू पाँचै जना भारतको मुम्बईबाट सँगै आएका थिए ।
आज कोरोना पुष्टि भएका तीन जना र यसअघि फेला परेका दुई जना युवाहरू कपिलवस्तु जिल्लाको मायादेवी गाउँपालिका-२ अभिरावका हुन् ।
यो पनि पढ्नुहोस नेपालमा थप ७ जनामा कोरोना पुष्टि, संक्रमित १०९ पुगेवडा नं. २ का वडाध्यक्ष सफरुद्दीन मुसलमानका अनुसार मुम्बईबाट आउँदै गरेको जानकारी पाएपछि स्थानीयवासीले उनीहरूलाई गाउँमा प्रवेश गर्न नदिई बाटोमै रोकेर क्वारेन्टाइनमा पठाएका थिए ।
यसअघि कोरोना पुष्टि भएका कपिलवस्तुका-२ जना बुटवलको धागो कारखानास्थित कोरोना अस्पतालमा उपचाररत छन् । नयाँ संक्रमित तीन जनालाई पनि आज बुटवल ल्याइँदैछ । उनीहरूमा कोरोना संक्रमण पुष्टि भए पनि लक्षण भने देखिएको छैन ।
उनीहरू पाँचैजना मायादेवी-१ को पकडी छत्रपाली माविमा बनाइएको क्वारेन्टाइनमा थिए । सो क्षेत्रमा हाल आउ-जाउ बन्द गरिएको छ ।
कपिलवस्तुका पाँच जनासमेत गरी प्रदेश ५ मा कोरोना संक्रमण पुष्टि भएकाहरुको संख्या ३० पुगेको छ । यसअघि बाँकेको नेपालगञ्जमा २४ र रुपन्देहीमा एक जनालाई कोरोना पुष्टि भएको थियो ।
यो पनि पढ्नुहोस भुल्केका नयाँ संक्रमित : पहिले नेगेटिभ, पुनःपरीक्षण गर्दा पोजेटिभ