४ जेठ, हेटौंडा । कोरोना भाइरस महामारीका कारण एक जनाको मृत्यु भएपछि बागमती प्रदेशले सतर्कता अपनाउन थालेको छ ।
प्रदेश सरकार कोरोना महामारी रोकथाम तथा नियन्त्रणका लागि गम्भीर भएर लकडाउनको कार्यान्वयनमा लागेको आन्तरिक मामिला तथा कानूनमन्त्री शालिकराम जम्मकट्टेलले बताए । उनले प्रदेशका सबै जिल्लामा कडाईका साथ लकडाउन कार्यान्वयनका लागि निर्देशन दिएको बताए । कोरोना संक्रमणका कारण शनिबार नेपालमा एक सुत्केरीको मृत्यु भएको थियो ।
बाह्य जिल्लाबाट आएकालाई निगरानी गर्दै क्वारेन्टाइन पठाउने र परीक्षण गरी रोगको संक्रमण नदेखिए दुई साता होम क्वारेन्टाइनमा राख्ने देखिए उपचारमा समावेश गराउने गरिरहको मन्त्री जम्मकट्टेलको भनाइ छ ।
संघीय सरकारले गरेको लकडाउन नागरिकको सुरक्षा तथा प्रदेश र स्थानीय तहलाई जिम्मेवार बनाउन भएको भन्दै उनले यसको पालना गर्नुपर्ने धारणा राखे ।
छिमेकी राष्ट्र भारतबाट आउने नेपाली वा भारतीय नागरिक नेपाल प्रवेशमा सीमाबाटै कडाई गर्नुपर्ने बताए । उनले उनीहरुको स्वास्थ्य परीक्षण गरी अवस्थाको बारेमा बुझेर मात्र गन्तव्यमा जान मिल्ने व्यवस्था गर्न संघीय सरकारले ध्यान दिन जरुरी रहेको बताए ।
संघीय राजधानी प्रवेश गर्न नदिने नीति भन्दा पनि प्रदेशमा र स्थानीय तहलाई व्यवस्थापनको लागि सहयोग गर्ने र व्यवस्थापनको बिषयमा जानकारी दिन आवश्यक रहेको मन्त्री जम्मकट्टेलले बताए ।
