१९ पुस, काठमाडौं । नेपाली कांग्रेसका पुराना नेता निरञ्जन कोइरालाको ७५ वर्षको उमेरमा आइतबार निधन भएको छ ।
भारतको नयाँ दिल्लीस्थित म्याक्स अस्पतालमा उपचारका क्रममा आइतबार बिहान ११ बजे निधन भएको कांग्रेसका मुख्य सचिव कृष्णप्रसाद पौडेलले जानकारी दिए ।
निरंकुश पञ्चायती शासनका विरुद्ध प्रजातान्त्रिक आन्दोलन र राजनीतिमा सक्रिय निरञ्जन कोइराला नेपालका पुराना र प्रतिष्ठित पर्यटन व्यवसायी समेत थिए । तत्कालीन पर्यटन मन्त्री रामहरि जोशीको विज्ञ सल्लाहकारका रुपमा रहेर समेत उनले कार्य गरेका थिए । उनी नेपाली कांग्रेसका केन्द्रीय सदस्य डा. शेखर कोइरालाका दाजु हुन् ।
केशवप्रसाद कोइरालाका जेठा छोरा निरञ्जनले राजनीतिशास्त्रमा स्नातकोत्तर गरेका थिए । उनी ०४८ सालतिर काका गिरिजाप्रसादसँग नजिक थिए । तर, त्यो निकटता धेरै समय टिकेन । पत्नी सन्तोषको ललितपुर भट्टेडाँडामा भएको विमान दुर्घटनामा निधन भएपछि उनी विरक्तिए र राजनीतिबाट टाढा हुन पुगे ।
त्यसपछि निरञ्जनले भारतीय औद्योगिक घरानाकी इला डालमियासँग विवाह गरे । र, नयाँदिल्लीतिरै बस्न थालेका थिए ।
उनको निधनप्रति नेपाली कांग्रेसका सभापति शेरबहादुर देउवाले गहिरो दुःख व्यक्त गर्दै भावपूर्ण श्रद्धाञ्जली अर्पण गरेका छन् ।
यो पनि पढ्नुहोस
कोइराला परिवारको कमब्याकः कति सम्भव ?
