सबै भन्सार राजस्वको भुक्तानी अब विद्युतीय प्रणालीमार्फत

वैदेशिक व्यापारको नियमन गर्ने र देशको कुल राजस्वको झण्डै ४५ प्रतिशत वाषिर्क रुपमा राजस्व संकलन गर्ने भन्सार विभाग तथा अन्तर्गत कार्यालयहरुले दिने सेवाहरुलाई वेवमा आधारित बनाउँदै लगिएको र भन्सारमा बुझाउने राजस्वको समेत व्यवसायीहरुले विद्युतीय माध्यमबाटै तिर्न सम्भव हुने देखिएकोले राजस्व भुक्तानीमा यसको उपयोग गर्नु पर्ने आवश्यकता महसुस भैसकेको थियो ।

सोही अनुसार चालु वर्षको बजेट बक्तव्यमार्फत यसलाई कार्यान्वयनमा ल्याउने गरी घोषणा भएकोले विद्युतीय प्रणालीको शुरुवात गर्ने तयारी गरिएको छ । यसको कार्यान्वयनको लागि कार्यदल बनाई अर्थ मन्त्रालय, महालेखा नियन्त्रक कार्यालय, नेपाल राष्ट्र बैंक र अन्य बैंक तथा वित्तिय संस्थाहरुसंगको राय परामर्श र सहयोगमा भन्सारमा बुझाउनु पर्ने राजस्वको भुक्तानी विद्युतीय माध्यमबाट गर्न सकिने सिफारिसका आधारमा १ पुस  २०७८ देखि सुक्खा बन्दरगाह भन्सार कार्यालय, वीरगन्जबाट परीक्षणको रुपमा शुरु गरी त्यसमा सफलता देखिएपछि अगाडि बढाउने निर्णय भएको हो ।

भन्सार विभागले नेपाल राष्ट्र बैंकको राष्ट्रिय भुक्तानी स्वीचको संचालक निकाय नेपाल क्लियरिङ्ग हाउस लिमिटेडसँग समन्वय गरी भन्सारको आसिकुँडा प्रणालीमा भुक्तानी संयन्त्रको संयोजन गरिएको छ । यस प्रणालीको प्रयोग गरी यसका प्रयोगकर्ता व्यवसायी तथा अन्य ब्यक्तिहरुले उपयुक्त कुनै उपकरणहरुमा आवद्व भई आफ्नो बैंक खाताबाट भन्सारमा तिर्नुपर्ने राजस्व रकम भन्सार कोष खातामा जम्मा हुने गरी भुक्तानी गर्न सकिने व्यवस्था नै विद्युतीय भुक्तानी प्रणाली हो ।

यसरी विद्युतीय भुक्तानी गर्न प्रयोगकर्ताले नेपाल क्लियरिङ्ग हाउसको कनेक्ट आई. पि. एस., मोवाईल एप, कपेर्ट पे, एनसीएचएल बैक सेन्टर तथा नेपाल क्लियरिङ्ग हाउससँग आवद्व रहेका डिजिटल वालेटहरु प्रयोग पनि गर्न सक्नेछन् ।

विद्युतीय भुक्तानी गर्दा प्रयोगकर्ताले आफूलाई उपयुक्त उपकरण छनौट गरी त्यसमा यूजर नाम र पासवर्ड प्राप्त गर्नुपर्छ । त्यसमा आफ्नो बैंक खाता लिंक गरी बैंक शाखाबाट सो प्रमाणित गराउनुपर्छ । भन्सारमा मालबस्तुको घोषणा तथा जाँचपासको कार्य सम्पन्न भएपश्चात प्रज्ञापनपत्रको साधारण विवरणहरु प्रविष्ट गरी भुक्तानी हुनुपर्ने रकम समेत यकिन गरी आफूले प्रयोग गरेको बैंकिङ्ग माध्यमबाट सिधै भुक्तानी गर्न सकिने व्यवस्था गरिएको छ । भुक्तानीकर्ताले पैठारीकर्ताको नाम तथा भुक्तानी हुने राजस्व यकिन गरी भुक्तानी प्रक्रिया अगाडि बढाउने र भुक्तानी सफल भएको जानकारी आएमा भन्सारमा रहेको बैंक शाखाबाट राजस्व भुक्तानीको रसिद समेत प्राप्त हुनेछ ।

यसको प्रयोगबाट व्यवसायीहरुले भन्सार राजस्व तिर्न बुझाउन नगद बोक्नुपर्ने वा गुड फोर पेमेन्टको चेकमार्फत भुक्तानी गर्न बैंकमा पुग्नु पर्ने समस्याबाट मुक्त भै इन्टरनेट सेवा भएका स्थानहरुबाट राजस्व भुक्तानी गर्ने सुविधा प्राप्त हुनेछ ।

विद्युतीय भुक्तानीको प्रयोगले भन्सार कार्यालयहरुमा जम्मा भएको राजस्वको वास्तविक तथ्यांक समेत तत्कालै प्राप्त गर्न सकिने छ ।

-पुण्यविक्रम खड्का, निर्देशक, भन्सार विभाग