मोरङको उखुबारी घटना पछ्याउँदा थेंचोमा भेटियो तेस्रो शव

२० माघ, काठमाडौं । ललितपुरको थेंचोमा खाल्डो खनेर गाडिएको अवस्थामा एक जनाको शव भेटिएको छ ।

गोदावरी नगरपालिका–१२, थेंचोस्थित एउटा घरको पछाडिपट्टि गाडिएको अवस्थामा तेह्रथुमका मोहन लिम्बुको शव भेटिएको हो । करिव ५ फिट गहिरो खाल्डोमा गाडिएको शव गलाउन २५/३० प्याकेट नुन समेत हालेको भेटिएको छ ।

मोरङको धनपालथान गाउँपालिका–२ को उखुबारीमा गत माघ १३ र १४ गते दुई जनाको शव गाडिएको अवस्थामा भेटिएको थियो । सो घटनाको अनुसन्धानका क्रममा अपराध अनुसन्धान महाशाखाले अनिल मण्डललाई पक्राउ गरेको थियो ।

यो पनि पढ्नुहोस

‘लेनदेन मिलाउन हिंडेका थिए, उखुबारीमा शव भेटियो’

उनको बयानका आधारमा प्रहरीले थेंचोमा प्रमिश थापा मगरको घर पछाडि खोजी गर्दा गाडिएको अवस्थामा लिम्बुको शव फेला परेको एसएसपी बसन्तबहादुर कुँवरले अनलाइनखबरलाई बताए । लिम्बुको घाँटीमा नाइलनको डोरी कसेर हत्या गरेको पाइएको छ ।

गोदावरी नगरपालिका–१२ कि वडासदस्य शोभा कार्कीका अनुसार यो घरमा लामो समय प्रि–प्राइमरी स्कुल थियो ।

तर लकडाउनपछि स्कुलले छाडेको यो घर अनिल मण्डलसहितको समूहले करिव ३ महिनाअघि भाडामा लिएको थियो ।

प्रारम्भिक अनुसन्धानका क्रममा खुलेअनुसार मोरङको धनपालथान गाउँपालिका–२ को उखुबारीमा गाडिएको अवस्थामा शव भेटिएका राजेन्द्रकुमार श्रेष्ठ र शम्भु चौधरीका साथै थेचोमा शव भेटिएका लिम्बुले अनिलसँग मिलेर जग्गा कारोबार गर्दै आएका थिए ।

लेनदेनकै विवादका क्रममा तीन जनाको हत्या भएको हुनसक्ने प्रहरीको आशंका छ । प्रहरीका अनुसार अनिल मण्डल २८ मंसिरसम्म थेंचोमा देखिएका छन् । यहाँ लिम्बुको हत्या गरेर मोरङमा गएको र श्रेष्ठ र चौधरीको हत्या गरेको हुनसक्ने अनुसन्धान अधिकृतहरुको आशंका छ ।