‘दुई कार्यकाल तुलना गरेर मत दिनुहोला’

२०७० सालमै सभासद भइसक्नुभएको तपाईं करिब एक दशकपछि फेरि जनप्रतिनिधि बन्न किन चाहनुभएको ?

मलाई ललितपुर–१ मा अझै सेवा गर्ने चाहना छ । यो क्षेत्रका मतदाताले मलाई उम्मेदवारीका लागि हौसला दिनुभयो । अनि नेपाली कांग्रेस, माओवादी केन्द्र र एकीकृत समाजवादीका सहकर्मीहरूले मलाई अघि सार्नुभयो । र नेपाली कांग्रेसको नेतृत्वले पनि मलाई उपयुक्त देखेकाले मैले सेवा गर्न पाऊँ भनेर घरदैलो गरिरहेको छु ।

तपाईंका एजेण्डा के के छन् ?

ललितपुर–१ मा तीनवटा एजेण्डा छन् । बाटोको विकास पहिलो एजेण्डा हो, बाटो मात्रै बनेमा अरू धेरै पूर्वाधारको स्वतः विकास हुन्छ । २०७० सालमा यहाँ एक मात्रै एजेण्डा बाटो थियो, अहिले त्यो फेरिएर ‘राम्रो बाटो’ भएको छ । उनीहरूले पाँच वर्षमा बाटोको अवस्था खराब भयो भनेर ‘राम्रो बाटो’ चाहिन्छ भन्न थालेका छन् ।

खानेपानी अर्को एजेण्डा हो, यो समस्या धेरै हदसम्म समाधान भइसकेको छ । ललितपुर–१ मा व्यवसायबाटै रोजगारी सिर्जना गर्न सकिन्छ । यो कुनै पनि दलले घोषणा गरेको भरमा हुने होइन, बरु मिहिनेत गरेर सिर्जना गर्ने विषय हो ।

अर्थतन्त्रमा सुधार आएर व्यवसाय फस्टाएमा स्वतः रोजगारीको सिर्जना हुन्छ । यहाँ तरकारी खेती, फलफूल, चिया, कफीलगायतको सम्भावना छ । यी कृषि उपज उत्पादन विस्तार गरेपछि हामीलाई काठमाडौंको बजार सहज छ । यो क्षेत्रमा फाइदा देखेमा शहर गएको जनशक्ति गाउँ फर्किन्छ । रोजगारी आफैं सिर्जना हुन्छ ।

राष्ट्रिय एजेण्डा के छन् ?

लेले–चन्दनपुर सडक पछिल्लो पाँच वर्षमा भत्किएको छ, सुधार हुन सकेन । पाँच वर्षअघि यो सडक पार गर्न सवा एक घण्टा लाग्थ्यो भने अहिले साढे २ घण्टा लाग्छ । भएका बाटोको सुधारका काम भएनन् । कान्ति लोकपथको स्तरोन्नतिका लागि पनि यो अवधिमा काम भएन ।

कान्ति लोकपथले ललितपुरबाट हेटौंडा जोड्छ । ललितपुरको भाग विजोग छ, हेटौंडाको भाग राम्रो छ । मैले बाटो होइन, राम्रो बाटो निर्माणको पहल गर्छु भन्ने प्रतिबद्धता जनाएको छु । ललितपुरका शहर र नजिकको गाउँको सहायक सडक सुधारका लागि नीतिगत पहल गर्नेछु भन्ने प्रतिबद्धता जनाएको छु ।

तर तपाईं त कानुन निर्माता हुन खोजिरहनुभएको छ ?

म संविधानसभा सदस्य हुँदा विभिन्न उपसमितिमा रहेर नीतिनिर्माणका क्रममा भूमिका खेलेको थिएँ । म अर्थ समितिमा बसेको थिएँ, अब पनि त्यही समिति मेरो प्राथमिकता हुनेछ । सहकारी, बैंकिङ कानुन र सार्वजनिक खरिद कानुन निर्माणमा मेरो कुनै न कुनै योगदान छ । म प्रतिनिधिसभामा गएर चर्को र उट्पट्याङ कुरा गर्नुभन्दा पनि गम्भीर भएर जिम्मेवारी पूरा गर्नेछु ।

२०७० सालमा निर्वाचित हुँदा चाहिं के गर्नुभयो त ?

म त्यतिबेला एक्लै थिएँ, टिम थिएन । त्यतिबेला संविधानसभा सदस्यको हैसियतले संविधान लेखनमा पनि भूमिका थियो, सांसदको भूमिका छँदैथियो । स्थानीय तहमा जनप्रतिनिधि नभएकाले त्यो रिक्तता पनि आफैंले सम्बोधन गर्नुपथ्र्यो ।

वडा सदस्य समेत नभएकाले त्यो काम जिम्मेवारी पनि पूरा गर्नुपरेको थियो । म एक्लो भएकाले गर्न खोजेको कतिपय काम पनि गर्न सकिनँ । मपछिका जनप्रतिनिधिले यो अभाव व्यहोर्नुपरेन । टिम थियो, सबै पद्धति सेट भइसकेको थियो । तर यति हँुदाहँुदै पनि अघिल्लो कार्यकालमा नै ज्यादा काम भएको थियो ।

२०७० देखि २०७४ सालसम्म चार वर्षको अवधिमा कति काम भयो ? अनि २०७४ देखि २०७९ सालसम्म पाँच वर्षको अवधिमा कति काम भयो, हेरौं । मपछिका जनप्रतिनिधिले एक वर्ष बढी समय पाउनुभयो । त्यसैले ललितपुर–१ का जनताले यो काम हेरेर मूल्यांकन गरुन् ।