जमुनाह नाकामा सीमापारि जाने उपभोक्ताको लर्को

२८ भदौ, बाँके । नेपालगञ्जस्थित जमुनाह नाकामा सीमावर्ती भारतीय बजार रुपैडिहा जाने नेपाली उपभोक्ताको लर्को लागेको छ ।

नेपालगञ्ज भन्सार कार्यालयले रु१०० भन्दा बढीको सामान ल्याउँदा भन्सार तिर्नुपर्ने गरी कडाइ गरे पनि घरायसी उपभोगका सामानसँगै चाडपर्वका लागि आवश्यक पर्ने खाद्यान्न र लत्ताकपडा खरिदका लागि दैनिक हजारौंको सङ्ख्यामा नेपाली रुपैडिहा बजार पुग्ने गरेका हुन् ।

अहिले प्रत्येक दिन दस हजारभन्दा बढी नेपाली जमुनाह नाका हुँदै रुपैडिहामा जाने गरेको जमुनाहस्थित इलाका प्रहरी कार्यालयका प्रमुख प्रहरी निरीक्षक मीनबहादुर विष्टले बताए । ‘शुक्रबार र शनिबार सीमामा थामिनसक्नु भीड लाग्ने गरेको छ’ उनले भने, ‘सहजरुपमा आवतजावतको लागि हरदम प्रयास गरिरहेका छौं ।’

तीजको किनमेल गर्न रुपैडिहामा नेपाली उपभोक्ताको लर्को लागेपछि यतिबेला नेपालगञ्जका व्यापारी चिन्तित छन् । बाँकेका ग्रामीण क्षेत्र र बर्दिया, दाङ, सुर्खेत, दैलेख, जाजरकोट र सल्यान लगायत स्थानका उपभोक्ता समेत किनमेलका लागि भारत जाने गरेका छन् ।

अधिकांश उपभोक्ता नेपाली  हुने भएकाले रुपैडिहामा नेपाली रुपैयाँमा कारोबार हुने गरेको छ । व्यापारीले पसलमा काम गर्ने कामदार समेत नेपालीलाई राखेर भाषाका लागि सहज बनाएका  छन् ।

नेपाली उपभोक्ताको भरमा रुपैडिहा बजार चलेको मोफसलका पत्रकार सन्तोष शुक्लाले बताए । तीज आउन केही दिन बाँकी रहे पनि नेपालगञ्ज बजार सुनसान छ । बजारमा उपभोक्ताको चहलपहल कम छ तर सीमापारि भारतीय बजार रूपैडिहामा किनमेल गर्ने नेपाली उपभोक्ताको चहलपहल बढेको छ ।

चाडपर्व मात्र होइन, अन्य समयमा पनि दैनिक उपभोग्य सामग्रीका लागि नेपाली उपभोक्ता भारतीय बजार रूपैडिहामै निर्भर रहने गरेको नेपालगञ्ज उद्योग वाणिज्य सङ्घका पूर्वअध्यक्ष कृष्णप्रसाद श्रेष्ठले बताए ।

रुपैडिहा बजार नेपाली उपभोक्ताको भरमा टिकेको छ । दैनिक करिब रु१ करोडको कारोबार नेपाली उपभोक्ताबाटै हुने गरेको छ ।

दैनिक उपभोग्य सामान, तरकारीलगायत वस्तु किन्न सयौं नेपाली सीमा पार जान्छन् । नेपालगञ्जमा चाडपर्वको बेलामा पनि कारोबारमा कमी आएको उहाँको भनाइ थियो । नेपाली उपभोक्ता भारतीय बजार किनमेलका लागि जाने परम्परा पुरानै भएकाले उनीहरूलाई नेपालगञ्जमै रोक्न नेपालगञ्ज उद्योग वाणिज्य सङ्घको प्रत्येक निर्वाचनका बेला चुनावी नारा बन्ने गरे पनि निर्वाचनपछि सेलाउँदै जाने गरेको छ ।

‘हामीले सङ्घको तर्फबाट धेरै प्रयास गरेका छौं हाम्रो मात्रै प्रयासले केही हुनसकेको छैन ।’ सस्तो पाइने लोभमा नेपाली उपभोक्ता रुपैडिहा जाने चलनले नेपालगञ्जका व्यवसायी धरासायी भएका छन्।

‘हामीले बेला बेलामा उपभोक्ता जागरण कार्यक्रम गरेर सम्झाउने काम गरेका छौं’ सङ्घका अध्यक्ष अब्दुल वाहिद मन्सुरीले भने, ‘भारतीय बजारमा सबै सामान सस्तो पाइन्छ भन्ने भ्रम नेपाली उपभोक्तामा हट्न सकेको छैन ।’

पछिल्लो एक सातायता किनमेल गर्न रुपैडिहातर्फ जाने नेपाली उपभोक्ताको भीड बढेको जमुनाहस्थित इलाका प्रहरी कार्यालयका प्रमुख वरिष्ठ प्रहरी नायब निरीक्षक माधव रिजालले बताए । उनका अनुसार दैनिक करिब दुई/तीन सय नेपाली उपभोक्ता किनमेलका लागि रुपैडिहा जाने गरेका छन् ।

घरायसी प्रयोजनका सामान किन्न सीमावर्ती बजारतिर धाउने सीमा क्षेत्रका स्थानीयवासीसँगै चाडपर्वका बेला टाढा–टाढाबाट पनि नेपाली उपभोक्ता रुपैडिहा जाने गर्दछन् । घर रङ्गरोगनदेखि विद्युतीय सामग्री, मसला, फलफूल र लत्ताकपडा प्रायजसोले रुपैडिहाबाटै खरिद गरेर ल्याउने गरेका छन् ।