बच्चालाई धेरै बाक्लो लुगा लगाइदिंदा समस्या पनि हुनसक्छ  

२०८० माघ २९ गते १४:१३

डा. रामभक्त सुवेदी न्युरोलोजिस्ट तथा बालरोग विशेषज्ञ

जाडोयाममा चिसोबाट बच्न बाक्लो लुगा लगाउनु एक उपाय हो । अझ बालबालिकालाई चिसोले झनै छिटो भेट्ने भएकाले शरीर न्यानो राख्न धेरै बाक्लो लुगा लगाइदिने गरेको देखिन्छ । बच्चाको पूरै शरीर ढाक्ने गरी ज्याकेट, स्वीटर, मोजा, पञ्जा, हाइनेक, टोपी, मफलरलगायत लगाइदिने चलन त छ नै, त्यसमाथि पनि अरु लुगा लगाइदिएको पाइन्छ ।

यसरी तह-तह गरेर लुगा लगाइदिंदा चिसोबाट जोगाउन सकिएला, तर यसको फाइदा मात्रै हैन बेफाइदा पनि हुनसक्छ । जाडोका धेरैजसो लुगा लुगा ऊलन र फरबाट बनेका हुन्छन्, जुन जनावरको रौं र धेरै प्रकारका रसायनको प्रयोग गरेर तयार पारिएको हुन्छ ।

यसरी लुगा लगाइदिंदा बालबालिकामा केही समस्या देखिन सक्छ ।

शरीर चिलाउने

बालबालिकालाई धेरै लुगा लगाइदिनाले शरीर चिलाउने समस्या हुनसक्छ । हिजोआज बालबालिकालाई आकर्षक र न्यानो बनाउन ऊलन, फर भएको लुगा सिधै छालामा स्पर्श हुने गरी लगाइदिंदा बालबालिकामा शरीर चिलाउने समस्या देखिन्छ । किनकि यी कपडा जनावरको रौं र विभिन्न केमिकल मिसाएर तयार पारिन्छ । त्यस्तै टोपी, मोजा र पञ्जा पनि हरेक समय लगाइराख्नाले टाउको, हातखुट्टा चिलाउने समस्या हुनसक्छ ।

यो पनि पढ्नुहोस

जाडोमा नानीबाबुहरूको ख्याल राखौं

छालामा रातोपन

धेरै लुगा लगाइदिंदा बालबालिकाको छालामा रातो दाग आउन सक्छ । रातो दाग धेरै कन्याउनाले र बच्चालाई कसिलो लुगा लगाइदिनाले रक्तसञ्चारमा अवरोध हुनसक्छ । जसले गर्दा शरीरमा राता दाग आउने, चिलाउने र सुन्निने हुनसक्छ । यसलाई बेवास्ता गरेमा घाउ भएर पाक्ने समस्या हुनसक्छ ।

बालबालिकालाई नियमित टोपी लगाइरहँदा निधार, कान चिलाउने, टाउको चिलाउने हुन्छ । किनकि शरीरभित्रको पसिना आउँछ तर बाहिर निस्किन पाउँदैन । यसले गर्दा छालमा रातो रातो खटिरा देखिने हुनसक्छ ।

एलर्जी

बालबालिकालाई छालामा संक्रमण हुनसक्छ । धेरै लुगा लगाइदिंदा वा लामो समयसम्म लगाइराख्नाले शरीरमा पसिना आउँछ तर पसिना बाहिर निस्किन पाउँदैन । यसकारण पनि बालबालिकामा फंगल संक्रमण जोखिम पनि हुनसक्छ । छाला शरीर चिलाउने, पोल्ने, सुक्खा हुने हुन्छ र पसिना शरीर बाहिर आउन नपाउँदा बालबालिकालाई चिसो लाग्ने, खोकी लाग्ने सम्भावना बढी हुन्छ । त्यसैले कहिलेकाहीं अभिभावकहरु शरीर सबै ढाक्ने गरी लुगा लगाए पनि चिसो लाग्यो भन्ने सुनेको होला, यही कारणले गर्दा हुन्छ । बालबालिकाको छाला संवेदनशील हुने भएकालाई छिट्टै संक्रमण हुन्छ ।

जोगाउने तरिका ?

बालबालिकालाई न्यानो बनाउन धेरै लुगा लगाइदिनुको सट्टा आरामदायक लुगाको छनोट गर्नुपर्छ । बालबालिकाको छालालाई ध्यानमा राख्दै भित्री छालामा स्पर्श गर्ने लुगा कटन वा सुतीको लगाइदिने गर्नुपर्छ । त्यसमाथि मात्र ऊलन वा फर भएको लुगा लगाइदिनुपर्छ । यसरी लगाउँदा शरीरभित्र पसिना आएमा पनि लुगाले सोस्छ ।

खुकुलो लुगा लगाइदिनुपर्छ । यस्तो लुगा लगाउनले शरीरमा रातो दाग आउने, रक्तसञ्चारमा अवरोध हुने समस्या न्यून हुन्छ । यसैगरी सुत्ने बेला ऊलनको लुगा लगाएर नसुताउने, यसको सट्टा सिरक वा कम्बलको प्रयोग गर्नुपर्छ ।

हट टपिक्स

अल्जाइमर

आयुर्वेद

इन्डोक्राइन (हर्मोन रोग)

एचआईभी

नेत्ररोग

प्रसूति तथा स्त्रीरोग

बालरोग

मानसिक स्वास्थ्य (डिप्रेसन, एन्जाइटी)

मिर्गौला तथा मुत्र रोग

मुख तथा दन्त रोग

योग तथा प्राणायाम

हेपटाइटिस