मोलुस्कम कन्टाजियोसम कस्तो रोग हो ?

नेपालमा पछिल्लो समय किशोरकिशोरी, युवायुवती तथा वयस्कहरूमा यौन संक्रमणमको समस्या बढ्न थालेको छ । त्यसमध्ये पनि मोलुस्कम कन्टाजियोसमको संक्रमण तीव्र रूपमा बढ्दै गएको देखिएको छ ।

मोलुस्कम कन्टाजियोसम एक प्रकारको भाइरल संक्रमण हो, जुन छालामा स-साना गाँठाहरूको रूपमा देखा पर्छ । वयस्कहरुमा यो भाइरस प्रायः यौन सम्पर्कको माध्यमबाट फैलिन्छ, जसकारण यो उमेर समूहमा यसको दर बढ्दै गएको देखिन्छ ।  हुन त स-साना बालबालिकाहरुमा पनि यो समस्या नदेखिने भने होइन । संक्रमित व्यक्तिको सम्पर्कमा अएपछि यो रोग सर्छ ।

लक्षण

मोलुस्कम कन्टाजियोसमको संक्रमणले स-साना, गोलाकार, चिल्लो र मोती जस्तै सेतो गाँठाहरु उत्पन्न गर्छ । यी गाँठाहरू प्रायः २-५ मिलिमिटर व्यासका हुन्छन् र यी गाँठागुठीहरु यौनाङ्ग वरिपरि देखिन्छन् । गाँठाहरू प्रायः नदुख्ने तर कहिलेकाहीं चिलाउने वा रातो हुने हुन्छ ।

जटिलता

यो संक्रमण सामान्यतया गम्भीर हुँदैन, तर केही अवस्थामा गाँठाहरूमा संक्रमण भएर छालाको अरू समस्या उत्पन्न हुनसक्छ । रोगप्रतिरोधात्मक क्षमता कमजोर भएका व्यक्तिमा यो संक्रमण लामो समयसम्म रहन सक्छ । त्यसले जटिलता पनि निम्त्याउन सक्छ ।

सर्ने कारण

मोलुस्कम कन्टाजियोसम प्रायः प्रत्यक्ष सम्पर्कबाट फैलिन्छ, विशेषगरी यौन सम्पर्कको माध्यमबाट । साथै, संक्रमित वस्त्र, तौलिया वा अन्य व्यक्तिगत सामग्रीको साझा प्रयोगबाट पनि यो संक्रमण फैलिन सक्छ । बच्चाहरूमा यो संक्रमण खेल्ने क्रममा प्रत्यक्ष सम्पर्कबाट सजिलै फैलिन सक्छ । यी संक्रमण बढ्नाको मुख्य कारणमा असुरक्षित यौन सम्पर्क, पर्याप्त यौन शिक्षाको अभाव र यौन संक्रामक रोगहरूका विषयमा सचेतनाको कमी भएको पाइएको छ । साथै, यो संक्रमण सजिलै फैलिने र प्रायः नचिलाउने र नदुख्ने भएकाले मानिसहरूले यसलाई गम्भीर रूपमा नलिने प्रवृत्तिले गर्दा यसको संक्रमण दर बढ्न थालेको पनि हुनसक्छ ।

निवारण के छ ?

यस संक्रमणबाट बच्न केही प्रभावकारी उपाय अपनाउन सकिन्छ । पहिलो र महत्वपूर्ण कुरा भनेको असुरक्षित यौन सम्पर्क नगर्नु नै हो । यौन सम्पर्क गर्दा कण्डमको प्रयोग गर्नुपर्छ । यसले मोलुस्कम कन्टाजियोसम लगायत अन्य यौन संक्रामक रोगहरूबाट बच्न मद्दत पुर्‍याउँछ, तर शतप्रतिशत सुरक्षित चाहिं हुँदैन ।

दोस्रो, किशोरकिशोरी, युवायुवती तथा वयस्कहरूमा यौन शिक्षामा ध्यान दिनु र उनीहरुलाई यौन स्वास्थ्यका बारेमा सचेत पार्नु हो । तेस्रो, संक्रमण भएका व्यक्तिले तुरुन्त चिकित्सकीय परामर्श लिनु र उपचार गराउनुपर्छ । व्यक्तिगत सामग्रीको साझा प्रयोग नगर्नु र आफ्नो सरसफाइमा ध्यान दिनुपर्छ ।

यो पनि पढ्नुहोस

के घामकै कारण हुन सक्छ छालाको क्यान्सर ?

यो पनि पढ्नुहोस

छाला किन चिलाउँछ ? हुनसक्छ जटिल समस्या पनि

यो पनि पढ्नुहोस

के छ सेतो दुभीको उपचार ?