अमेरिकी वैज्ञानिकले बनाए वृद्धवृद्धाको स्याहार सुसार गर्ने रोबोट

विश्वभर बदलिंदो सामाजिक तथा पारिवारिक संरचना, वृद्धावस्थाका मानिसहरुको बढ्दो संख्या तथा कामकाजी मानिसहरुको बढ्दो व्यस्ततासँगै बृद्धवृद्धाहरुको स्याहारसुसार तथा पालनपोषणको विषय पेचिलो बन्दै गएको छ ।

वृद्धावस्था भनेको आफ्नो दैनिक आवश्यकताका काम आफै गर्न नसक्ने उमेर हो र यो उमेरमा जुनसुकै बेलापनि अरु कोहीको साथ र सहयोग चाहिन्छ । सायद यही आवश्यकतालाई मध्यनजर गर्दै अमेरिकाले वृद्धवृद्धाको स्याहार सुसार गर्ने रोबोट तयार पारेको छ ।

E-Bar अर्थात् Elderly Bodily Assistance Robot नामक यो रोबोट केवल एउटा स्मार्ट डिभाइस मात्र होइन यो एक्लै परेका वृद्धावस्थाका व्यक्तिहरुको लागि सहारा बन्ने एक गेमचेन्जर आविष्कार सावित हुनसक्छ ।

म्यासाचुसेट्स इन्स्टिच्यूट अफ टेक्नोलोजीका इन्जिनियरहरुले यो रोबोटलाई विशेष गरी वृद्धवृद्धाहरुको दैनिक आवश्यकताहरुलाई ध्यानमा राखेर डिजाइन गरिएको हो । यो रोबोटले बुढाबुढीहरुलाई ओछ्यानबाट उठ्न मद्दत गर्ने मात्र नभएर कतै लड्न लागेमा पनि सम्हाल्दछ ।

यो रोबोटमा जडित अत्याधुनिक सेन्सर, क्यामेरा तथा खस्नबाट बचाउने प्रविधिले यसलाई केही सेकेण्डमै सक्रिय बनाउने वैज्ञानिकको दाबी छ ।

वृद्धवृद्धाहरु चाहे बाथरुममा चिप्लिएर लड्न लाग्दा होस् वा भर्यांगमा सन्तुलन गुमेर लड्न लाग्दा होस्, यो तुरुन्तै रेस्क्यू मोडमा आउँछ र दुर्घटना हुनबाट बचाइहाल्छ । यो केवल शारीरिक सहयोगसम्म मात्र सीमित छैन । हल्का हिंडडुल, शरीर तन्काउने जस्ता हलुका व्यायाम गराउनेदेखि लिएर केही मोडेलमा भ्वाइस कमान्ड लिनेसम्मका काममा यो रोबोट वृद्धवृद्धासँग उभिन्छ ।

इबार रोबोट अहिले अनुसन्धानकै चरणमा रहेको र अत्याधुनिक प्रविधिका कारण सुरुआती अवस्थामा यो निकै महँगो पर्ने सम्भावना छ । साथै आम मानिससम्म यसलाई पुर्‍याउन अझै केही वर्ष लाग्नसक्छ ।

वास्तवमा वृद्धवृद्धाहरुलाई केवल सहारा मात्र नभई आफ्नो कुरा सुन्ने मानिस पनि चाहिन्छ । त्यसैले आफ्नो रोबोटलाई त्यसका लागि पनि सक्षम बनाउने र मानिसका भावनात्मक आवश्यकतालाई पनि बुझ्ने खालको क्षमताको विकास गर्ने दिशामा वैज्ञानिकहरुले काम गरिरहेका छन् । त्यसैले भविष्यमा यसमा मूड पत्ता लगाउने, कुराकानी तथा एक्लोपन कम गर्नेवाला फिचर पनि जोडिनेछ ।