हनी ट्र्याप आरोपमा पक्राउ परेकी महिला ५० हजार धरौटीमा रिहा

प्रतीकात्मक तस्वीर ।

News Summary

Generated by OK AI. Editorially reviewed.

हनी ट्रयाप आरोपमा पक्राउ परेकी तारा गुरुङलाई ५० हजार रुपैयाँ धरौटीमा रिहा गरिएको छ।
उनीविरुद्ध ९२ लाख ४६ हजार रुपैयाँ बिगो मागदाबी गर्दै मुद्दा दायर भएको थियो।
उनले आरोपलाई अस्वीकार गर्दै पीडितसँग लिभिङ टुगेदरमा रहेको र रकम असुली नगरेको दावी गरेकी छन्।

२१ जेठ, काठमाडौं । हनी ट्र्याप आरोपमा पक्राउ परेकी तारा गुरुङ ५० हजार रुपैयाँ धरौटीमा रिहा भएकी छिन् ।

ललितपुर जिल्ला अदालतका न्यायाधीश हरिप्रसाद कोइरालाको इजलासमा ५० हजार धरौटीमा छाड्न आदेश दिएको थियो । त्यसपछि उनी धरौटी बुझाएर रिहा भएकी हुन् ।

उनलाई २० वैशाखमा प्रहरीले पक्राउ गरेको थियो । उनीविरुद्ध आपराधिक लाभ (एक्सटर्सन) को कसुरमा ९२ लाख ४६ हजार २९० रुपैयाँ बिगो मागदाबी गर्दै मुद्दा दायर भएको थियो ।

करिब साढे ३ वर्षअघि दोहोरी साँझमा भेटिएका एक युवकलाई हनी ट्रयापमा पारेर रकम असुलेको आरोप उनीमाथि छ । उनले भने पीडित भनिएका युवकसँग लिभिङ टुगेदरमा रहेको बताएकी थिइन् । र, हनी ट्र्यापमा पारेर रकम असुली नगरेको दाबी गरेकी छिन् ।