को-को छन् त्रिवि तोडफोडमा संलग्न ? सीसीटीभी फुटेज हेरेर हुँदैछ अनुसन्धान

२१ जेठ, काठमाडौं । त्रिभुवन विश्वविद्यालयका उपकुलपति प्रा.डा. खड्ग केसीको कार्यकक्षमा तोडफोड गर्नेविरुद्ध जाहेरी परेसँगै अनुसन्धान अगाडि बढेको छ । प्रहरी वृत्त कीर्तिपुरमा बुधबार त्रिविले जाहेरी दर्ता गराएको हो । जाहेरीमा सीसीटीभी फुटेज हेरेर पहिचान गरी अनुसन्धान गर्न भनेको छ ।

‘फुटेज हेरर पहिचान गरिरहेका छौँ,’ प्रहरी वृत्त कीर्तिपुरका प्रहरी नायव उपरीक्षक राजबाबु महर्जनले भने । सीसीटीभी फुटेज हेरेर अनुसन्धान भइरहेको उनले बताए । गत १४ नेविसंघका नेता कार्यकर्ता र नेविसंघबाट निर्वाचित भएका स्ववियुका पदाधिकारीले उपकुलपतिको कार्यालयमा तोडफोड र रेक्टर कार्यालयमा तालाबन्दी गरेका थिए ।

त्रिविको कार्यकारी परिषद्ले दोषीलाई कारबाही गर्ने निर्णय गर्दै प्रहरी वृत्त कीर्तिपुरमा निवेदन दिएका थिए । तर प्रहरीले जाहेरी मागेपछि त्रिविले बुधबार जाहेरी दिएको हो । प्रहरी वृत्त कीर्तिपुरले मंगलबार त्रिविलाई पत्र लेखेर जाहरी दिन भनेको थियो ।

‘प्रहरीकै अगाडि तोडफोड भएको छ । सार्वजनिक सम्पत्ति तोडफोड गर्नेविरुद्ध जाहेरी नै दिनु पर्ने त होइन । तर प्रहरीले मागेपछि प्रक्रिया पुर्‍याएर जाहेरी दिएका छौँ,’ त्रिविका एक अधिकारीले भने ।

सो दिन नेविसंघ निकटका विद्यार्थी नेता र नेविसंघबाटै निर्वाचित भएका स्ववियुका पदाधिकारीसमेत संलग्न थिए । काठमाडौं उपत्यकाका विभिन्न कलेजमा नेविसंघबाट निर्वाचित भएका स्ववियुका पदाधिकारीहरू स्नातकको भर्ना खुलाउने पर्नेे माग राखेर उपकुलपति कार्यालय पुगेका थिए ।

तर उपकुलपति केसी कार्यकक्षमा थिएनन् । र, विद्यार्थी नेताहरू उपकुलपतिको कार्यकक्षमा छिर्न खोजेपछि प्रहरीले रोकेको थियो । सो क्रममा विद्यार्थी नेताहरूले तोडफोड गरेका थिए ।

त्रिविले सीसीटीभी फुटेज र विज्ञप्तिमा हस्ताक्षर गरेको आधारमा तोडफोड र नाराबाजी गर्नेहरूको नाम पहिचान गरिएको जनाएको छ । त्रिविका अनुसार शंकरदेवका मदनराज उपाध्याय, भुवन ओझा, गजेन्द्र बम, भोजराज जोशी, लोकेश कुँवर, सविन भट्ट, सोनु साह, किशोर थापा छन् ।

पब्लिक युथ क्याम्पसका सन्तोष श्रेष्ठ, सरस्वती क्याम्पसका मुस्कानराज गौतम, भक्तपुर क्याम्पसका पुकार पराजुली, कैलाशकुट बहुमुखी क्याम्पसका मुरारी गौतम, काभ्रे बहुमुखी क्याम्पसका रोहित पराजुली, राजेश तिमिल्सिना लगायतको संलग्न रहेको त्रिविले जनएको छ ।

तोडफोडपछि संयुक्त हस्ताक्षर गरेको विज्ञप्ति र भिडियो पनि सार्वजनिक भएको छ ।

सार्वजनिक सम्पत्ति तोडफोड गर्नुलाई कानुनले समेत अपराध भनेको छ । मुलुकी अपराध संहितामा सार्वजनिक सम्पत्ति तोडफोड गर्नेलाई १ वर्षसम्मको कैद र १० हजार जरिवाना वा दुवै सजाय हुने व्यवस्था छ ।

शिक्षा, विज्ञान तथा प्रविधि मन्त्रालयले पनि त्रिविमा तोडफोड गर्नेलाई कारबाही गर्न गृह प्रशासनलाई आग्रह गरेको छ । बुधबार मन्त्रालयले विज्ञप्ति निकालेर शिक्षा मन्त्री रघुजी पन्तले दोषीलाई कारबाही गर्न गृह प्रशासनलाई अनुरोध गरेको मन्त्रालयले जनाएको छ ।

‘अनुशासनहीन र गैरकानूनी कार्यमा संलग्न जोसुकै भएपनि गम्भीर अनुसन्धानबाट पहिचान गरी कानुनी कारबाहीको दायरामा ल्याउन गृह प्रशासनको उच्च तहसँग परामर्श गर्दै सम्बन्धित पदाधिकारीलाई आवश्यक अनुरोध गर्नु भएको छ,’ विज्ञप्तिमा भनिएको छ ।

शिक्षा मन्त्रालयले पनि तोडफोडको घटनाको अनुसन्धान गरिरहेको जनाएको छ । ‘त्रिभुवन विश्वविद्यालय ऐन, २०४९ को दफा १७ (३) अनुसार सहकुलपतिका हैसियतबाट मन्त्रीज्यूले उक्त घटनाका सम्बन्धमा सुक्ष्म अध्ययन गरिरहनु भएको छ,’ विज्ञप्तिमा भनिएको छ ।

यो पनि पढ्नुहोस

शिक्षाले गृह मन्त्रालयलाई भन्यो– त्रिवि उपकुलपतिको कार्यालयमा तोडफोड गर्नेलाई कारबाही गर्नू

यो पनि पढ्नुहोस

त्रिविमा तोडफोड मच्चिरहन्छ, कारबाही हुँदैन

यो पनि पढ्नुहोस

त्रिविमा तोडफोड गर्नेहरूलाई सरकारकै संरक्षण

यो पनि पढ्नुहोस

जब प्रहरीकै अगाडि नेविसंघले उपकुलपतिको कार्यालयमा तोडफोड गर्‍यो (भिडियोसहित)