पतञ्जलिमा मैले कुनै बेठिक काम गरेको छैन : माधव नेपाल

News Summary

Generated by OK AI. Editorially reviewed.

नेकपा एकीकृत समाजवादीका अध्यक्ष माधवकुमार नेपालले पतञ्जलि जग्गा प्रकरणमा आफूले कुनै बेठिक काम नगरेको बताए।
उनले अनियमितता भए त्यो कर्मचारीले गरेको हुन सक्ने र आफूले संलग्नता नभएको बताए।
नेपालले कानुन व्यवसायीहरूसँग परामर्श गरी थप धारणा सार्वजनिक गर्ने बताएका छन्।

२२ जेठ, रौतहट । नेकपा एकीकृत समाजवादीका अध्यक्ष माधवकुमार नेपालले पतञ्जलि जग्गा प्रकरणमा आफूले कुनै बेठिक काम नगरेको बताएका छन् ।

रौतहटस्थित पार्टी कार्यालयमा बिहीबार प्रतिक्रिया दिँदै पूर्वप्रधानमन्त्री नेपालले अनियमितता भएको भए कर्मचारीले गरेको हुनसक्ने बताए ।

‘पतञ्जलिजस्तो संस्थामा त्यस्तो भएको होला भन्ने मैले कल्पना पनि गर्ने कुरा भएन,’ उनले भने, ‘जग्गा खरिद प्रकरणमा यताउता र अनियमितता भएको भए त्यो कर्मचारीबाट भएको होला, मेरो संलग्नता छैन ।’

नेपाली जनता स्वस्थ रहून् भनेर आफूले पतञ्जलिका लागि जग्गा उपलब्ध गराउने निर्णय गरेको उनको भनाइ छ ।

‘कसैले कसरी के-के लुपहोल्सहरू राख्यो, त्यो लुपहोल्समा ध्यान पुग्यो पुगेन, यावत कुराहरूको बारेमा राम्ररी नबुझी म केही भन्न सक्दिनँ,’ उनले थपे, ‘मैले त आफ्नो तर्फबाट कुनै बेठिक काम गरेको पनि छैन । मेरो त दिमागमा रहेको पनि होइन ।’

उनले आफूले अहिलेसम्म बदमासी नगरेकाले मुद्दा दर्ता हुँदैमा नडराउने बताए । ‘मैले बदमासी गरेको हुनुपर्‍यो नि डराउनलाई । मैले कुनै अनुचित काम गरेको छैन । र, अनुचित कामलाई प्रोत्साहन दिन पनि चाहन्नँ,’ उनले अगाडि भने ।

पूर्वप्रधानमन्त्री नेपालले काठमाडौं गएपछि कानुन व्यवसायीहरूसँग परामर्श गरेर थप धारणा सार्वजनिक गर्ने बताए ।