कीर्तिपुरमा भेटिनुपर्ने त्रिविका पदाधिकारी जब पुल्चोकमा भेटिए

२३ जेठ, काठमाडौं । त्रिभुवन विश्वविद्यालयमा नेविसंघका नेता तथा स्ववियु पदाधिकारीले तोडफोड र तालबान्दी गरेपछि पदाधिकारी कार्यालय प्रवेश गर्न पाएका छैनन् । त्रिवि अधिकारीहरूको अनुसार उपकुलपति, रेक्टर र रजिस्ट्रार कार्यालयबाट हुने कामकाज ठप्प भएको छ । ‘भीसी, रेक्टर र रजिस्ट्रार सर कार्यालयमा आउनु भएको छैन,’ त्रिविका एक अधिकारीले भने ।

ती कर्मचारीले भनेजस्तै त्रिविका तीन पदाधिकारी बिहीबार पुल्चोक क्याम्पसमा भेटिए । उनीहरू भेटिनु पर्ने थियो– कीर्तिपुरस्थित उपकुलपति, रेक्टर र रजिस्ट्रार कार्यालयमा । तर, पत्रकार सम्मेलन गर्न उपकुलपति प्रा.डा. खड्ग केसी, रेक्टर प्रा.डा दुविनन्द ढकाल र रजिस्ट्रार प्रा.डा. केदारप्रसाद रिजाल पुल्चोक पुगेका थिए । त्रिविमा प्राध्यापक, सहप्राध्यापक र उपप्राध्यापकको विज्ञापन आह्वान गरिएको विषयमा पत्रकार सम्मेलनको आयोजना गरिएको थियो ।

उक्त कार्यक्रममा पत्रकारको प्रश्न थियो– पत्रकार सम्मेलन कीर्तिपुरमा नगरेर पुल्चोकमा किन ? जवाफ दिन पदाधिकारी खासै तयार भएनन् । ‘तपाईंहरूलाई थाहै छ यसबारे नबोलौं होला,’ उपकुलपति केसी र रजिस्ट्रार रिजालले भने, ‘पुल्चोक पनि त हाम्रै सम्पत्ति हो ।’

गत १४ जेठमा नेविसंघका नेता कार्यकर्ताले उपकुलपति केसीको कार्यकक्षमा तोडफोड र रेक्टर कार्यालयमा तालाबन्दी गरेपछि पदाधिकारी कार्यकक्षमा जान सकेका छैनन् । यसबारे त्रिविले छानबिन र अनुसन्धान गर्न राज्यलाई जिम्मा दिएको छ । ‘हामीले सबै कुरा राज्यलाई जिम्मा दिएका छौं,’ उपकुलपति केसीले भने ।

रजिस्ट्रार रिजालको कार्यकक्षमा भने जनप्रशासन क्याम्पसको प्रमुख नियुक्तिको विषयलाई लिएर विद्यार्थीले ताला लगाएका छन् । तोडफोड र तालाबन्दी भएपछि त्रिविका पदाधिकारीले बाहिरैबाट काम गरिरहेका छन् ।

‘कहिले पुल्चोक, कहिले परीक्षा नियन्त्रण कार्यालयमा बसेर काम गरिरहनु भएको छ । आफ्नो कार्यकक्षमा बस्ने स्थिति छैन । दैनिक प्रशासिनक काम पनि रोक्न मिलेन,’ रजिस्ट्रार कार्यालयका एक कर्मचारीले भने, ‘कतै ताला, कतै तोडफोड भएको छ ।’

स्नातक तहको भर्ना खुलाउन माग राखेर नेविसंघबाट निर्वाचित भएका काठमाडौंका विभिन्न क्याम्पसका स्ववियु पदाधिकारीसहितको टोलीले १४ जेठमा त्रिविमा तोडफोड गरेको थियो । त्रिविका पदाधिकारीहरूलाई विद्यार्थीले ज्यान मार्नेसम्मको धम्की दिएका छन् । त्यसैले बिहीबार पत्रकार सम्मेलन स्थल बाहिर प्रहरी समेत परिचालन गरिएको थियो । ‘दलका विद्यार्थीसँग डराए प्रहरी बोलाइएको हो,’ त्रिविका एक कर्मचारीले भने ।

तोडफोडपछि त्रिविले दोषीलाई कारबाही गर्न प्रहरी वृत्त कीर्तिपुरमा जाहेरी दिएको छ । त्रिविले २१ जेठमा प्रहरी वृत्तमा जाहेरी दिएको हो । सीसीटीभी फुटेजको आधारमा दोषी पहिचान गरी कारबाही गर्न त्रिविले जाहेरीमा भनेको छ ।

तर हालसम्म तोडफोडमा संलग्नहरू पक्राउ परेका छैनन् । सार्वजनिक सम्पत्ति तोडफोड गर्नुलाई कानुनले समेत अपराध भनेको छ । मुलुकी अपराध संहितामा सार्वजनिक सम्पत्ति तोडफोड गर्नेलाई १ वर्षसम्मको कैद र १० हजार जरिवाना वा दुवै सजाय हुने व्यवस्था छ ।

शिक्षा, विज्ञान तथा प्रविधि मन्त्रालयले पनि तोडफोडमा संलग्नलाई कारबाही गर्न गृह प्रशासनलाई भनेको छ । त्रिविका अनुसार शंकरदेवका मदनराज उपाध्याय, भुवन ओझा, गजेन्द्र बम, भोजराज जोशी, लोकेश कुँवर, सविन भट्ट, सोनु साह, किशोर थापा छन् ।

पब्लिक युथ क्याम्पसका सन्तोष श्रेष्ठ, सरस्वती क्याम्पसका मुस्कानराज गौतम, भक्तपुर क्याम्पसका पुकार पराजुली, कैलाशकुट बहुमुखी क्याम्पसका मुरारी गौतम, काभ्रे बहुमुखी क्याम्पसका रोहित पराजुली, राजेश तिमिल्सिना लगायतको संलग्न रहेको त्रिविले जनएको छ । तोडफोडमा गृह मन्त्री रमेश लेखक निकटका विद्यार्थी नेताहरू सहभागी रहेको नेविसंघकै नेताहरूले बताउँदै आएका छन् ।

यो पनि पढ्नुहोस

को-को छन् त्रिवि तोडफोडमा संलग्न ? सीसीटीभी फुटेज हेरेर हुँदैछ अनुसन्धान

यो पनि पढ्नुहोस

त्रिविमा तोडफोड मच्चिरहन्छ, कारबाही हुँदैन

यो पनि पढ्नुहोस

त्रिविमा तोडफोड गर्नेहरूलाई सरकारकै संरक्षण

यो पनि पढ्नुहोस

जब प्रहरीकै अगाडि नेविसंघले उपकुलपतिको कार्यालयमा तोडफोड गर्‍यो (भिडियोसहित)