विदेशबाट फर्केर उद्यम गर्नेलाई सरकारको पुरस्कार

१७ असार, काठमाडौं । वैदेशिक रोजगारबाट नेपाल फर्की उद्यम गरेका उद्यमीलाई सरकारले पुरस्कृत गरेको छ ।

श्रम, रोजगार तथा सामाजिक सुरक्षा मन्त्रालयको चालु आर्थिक वर्ष २०८१/८२ को स्वीकृत वार्षिक कार्यक्रम ‘वैदेशिक रोजगारबाट फर्की नेपालमा उद्यम गरेका उद्यमीका लागि राष्ट्रिय पुरस्कार’ बाट उनीहरूलाई पुरस्कृत गरिएको हो ।

वैदेशिक रोजगारीमा गई पुन: स्वदेश फर्की वैदेशिक रोजगारीबाट आर्जित ज्ञान, सिप, अनुभव र पूँजीलाई उद्यमशीलता र रोजगारीका क्षेत्रमा अधिकारिक उपयोग गर्दै समृद्ध राष्ट्र निर्माणमा योगदान पुर्‍याउन थप जागरुक एवं प्रेरणा मिलोस् भन्ने मूल अभिप्राय लिइएको मन्त्रालयले जनाएको छ ।

कार्यक्रममा प्रत्येक प्रदेशको प्रतिनिधित्व रहने गरी ७ जनालाई ‘उद्यमी राष्ट्रिय पुरस्कार’ स्वरूप नगद ७५ हजार सहित सम्मानपत्र र दोसल्ला ओढाएर सम्मान गरिएको थियो ।

जसअन्तर्गत आमा कृषि फर्म उर्लाबारी मोरङका राजीव खड्का, निम्तो एग्रो फार्म जितपुर बाराका शंकर सिम्खडा, बैतेश्वर रेस्ट एस्ड क्याटरिङ सर्भिस बैतेश्वर दोलखाका कुमार श्रेष्ठ, बसन्त पोल्ट्री फार्म भानु तनहुँका बसन्तबहादुर खड्का, न्यु सन्ध्या होटल एन्ड रेस्टुरेन्ट र सासु बुहारी कृषि तथा पशुपालन फर्म अर्घाखाँचीका शोभाखर पौडेल, देउती होजियारी उद्योग एन्ड ट्रेडिङ सेन्टर वीरेन्द्रनगर सुर्खेतका लक्ष्मीप्रसाद ढकाल र कैलापाल बहुउद्देश्यीय कृषि फर्म पाटन बैतडीका तर्कसिंह विष्टले पुरस्कार तथा सम्मानपत्र प्राप्त गरेका हुन् ।

देशभरिबाट उत्कृष्ट उद्यमीका रूपमा भूमिका सिपमूलक तालिम केन्द्र दमक झापाका  रविन पोख्रेललाई ‘उत्कृष्ट उद्यमी राष्ट्रिय पुरस्कार’ स्वरूप नगद १ लाख ५० हजार सहित सम्मानपत्र र दोसल्ला ओढाएर सम्मान गरिएको थियो ।

पुरस्कृत तथा सम्मानित उद्यमी छनोट गर्दा ‘विदेशमा काम गरी फर्केका उद्यमी राष्ट्रिय सम्मान तथा पुरस्कार व्यवस्थापन कार्यविधि, २०७६’ ले तोकेबमोजिम रोजगारी सिर्जना, पूँजी लगानी, स्थानीय साधन, स्रोत र प्रविधि प्रयोग, उत्पादन निर्यात गरे/नगरेको, सामाजिक दायित्व बहन गरे/नगरेको, वातावरणमैत्री प्रविधि प्रयोग तथा प्रदूषण व्यवस्थापन र उद्यम सञ्चालन गरेको भौगोलिक क्षेत्र गरी जम्मा ७ वटा मूल्यांकन सूचकलाई आधार लिइएको थियो ।