दुई दिनमै फेरियो श्रीमान्‌को आदेश

२४ असार, काठमाडौं । ललितपुरका जिल्ला न्यायाधीश हरिप्रसाद कोइरालाले एकथरी आदेश गरेपछि फेरबदल गरेको भेटिएको छ । गत शुक्रबार एकथरी आदेश गरेका जिल्ला न्यायाधीश कोइरालाले दुई दिनपछि त्यसलाई फेरबदल गरेको भेटिएको हो ।

ललितपुरका न्यायाधीश कोइरालाको इजलासमा गत शुक्रबार ‘अंशियार घटाइ पाऊ’ भनी एउटा निवेदन परेको थियो । त्यही दिन न्यायाधीश कोइरालाले निवेदकको ‘माग बमोजिम हुने’ आदेश गरेका थिए ।

‘त्यो दिन फाँटका कर्मचारीहरुले तपाईहरूको जे माग थियो, त्यो कार्यान्वयन हुने भन्ने आदेश भएको छ भनेर बताएका थिए’ निवेदकले भने, ‘पछि बेवसाईट हेर्दा पनि माग बमोजिम हुने भन्ने आदेश थियो ।’

तर आइतबार बेवसाइटमा पहिले लेखेको व्यहोरा फेरेर ‘माग बमोजिम नहुने’ भनेर परिमार्जन भएको थियो । अदालतका कर्मचारीहरुले पनि फोन गरेर तपाईहरूको माग अनुसारको आदेश भएन है भनेर खबर गरेका थिए ।

अंश मुद्दा दायर गरे पनि हाल सुरक्षा सेवामा रहेको भन्दै उनले आफ्नो नाम र पहिचान खोल्न चाहेनन् ।

उनका अनुसार, बाबुआमा, दुई अविवाहित छोरी र दुई छोराहरूवीचको अंशविवाद परेको थियो । सर्वोच्च अदालत पुगेर टुंगिएको विवादमा निवेदकले ६ भागको १ भाग पाउने फैसला भएको थियो ।

फैसलापछि बाबुको निधन भयो । त्यसपछि निवेदक ‘अंशियार घटाइ पाऊ’ भनी जिल्ला अदालत ललितपुर पुगेका थिए ।

अदालतको तहसिल शाखाबाट अघि बढेको निवेदनको सुनुवाइपछि न्यायाधीश हरिप्रसाद कोइरालाले ‘माग बमोजिम नै हुने’ भन्ने आदेश गरेका थिए, जुन आदेश दुई दिनपछि फेरबदल भएको हो ।

ललितपुर जिल्ला अदालतका सूचना अधिकारी राम सञ्जिवन महतोले कुनै मुद्दा विशेषका बारेमा आफूलाई यत्तिकै जानकारी नहुने प्रतिक्रिया दिए । उनले भने, ‘त्यसमा के कसो भएको हो भन्न त बुझ्नै पर्छ, यत्तिकै त सम्भव हुँदैन ।’

न्यायाधीश कोइरालाले गतसाता मात्रै पक्राउ अनुमतिको विषयमा त्यस्तै आदेश गरेका थिए । एक व्यक्तिलाई निर्घात कुटपिट गरेको आरोपमा पक्राउ परेका महेन्द्र रावल र धर्मराज खड्कालाई उनले पक्राउ अनुमति दिएनन्, त्यसपछि दुवैजना छुटेका थिए ।

आदेश दिए लगत्तै पीडित पक्षले न्यायपरिषदमा उजुरी दिएको छ । न्यायाधीश कोइरालामा कार्यक्षमता नदेखिएको भन्दै उनीमाथि छानबिन र बर्खास्तीको माग राखी परिषदमा उजुरी परेको हो ।