रसुवा बाढी : ९ जनाको शव भेटियो, १९ अझै बेपत्ता

२४ असार, काठमाडौं । रसुवाको भोटेकोशी नदीमा आएको बाढीमा बेपत्ता भएका ९ जनाको शव भेटिएको छ । बाढीमा परेर अहिले पनि १९ जना बेपत्ता छन् ।

मंगलबार बिहानदेखि आएको बाढीमा चपेटमा परेका ५७ जनाको भने उद्धार भएको नेपाल प्रहरीले जानकारी गराएको छ ।

बेपत्ता हुनेमा ११ जना सर्वसाधारण, २ जना प्रहरी र ६ चिनियाँ नागरिक रहेका छन् । बाढीमा बगेर बेपत्ता भएका एक जना प्रहरीको शव भने चितवनमा फेला परेको छ ।

रामेछापको लिखु तामाकोशी गाउँपालिका वडा नम्बर ४ का ४२ वर्षीय प्रहरी निरीक्षक लालबहादुर श्रेष्ठको शव भरतपुर महानगरपालिका–२९ पन्ध्रकिलोमा फेला परेको चितवनका प्रहरी प्रवक्ता एवं प्रहरी नायव उपरीक्षक रवीन्द्र खनालले जानकारी दिए ।

बेपत्ता भएकाको खोजीकार्यमा ३८३ जना प्रहरी परिचालन गरिएको छ । बाढीबाट रसुवाको गोसाइकुण्ड गाउँपालिकाको १, २ र ३ वडा, आमाछोदिङ्मो गाउँपालिकाको १, २, ४ र ५ वडा, उत्तरगया गाउँपालिकाको २, ४ र ५ वडाका साथै कालिका गाउँपालिकाको १ नम्बर वडा सबभन्दा बढी प्रभावित भएका छन् ।

रसुवाको भोटेकोशी नदी (तिब्बततर्फ ल्हेन्दे खोला भनिने ) मा मंगलबार बिहान आएको भीषण बाढीले धनजनको ठूलो क्षति भएको छ । बाढीले  नेपाल–चीन जोड्ने सीमा–नाकाको मितेरी पुल नै बगाएपछि दुई देशबीचको सीमा व्यापारसमेत ठप्प भएको छ ।

बाढीले ३५ वटा ईभी गाडी बगाएको छ । सामानसहितका २४ वटा कन्टेनर समेत बाढीमा बगेको छ भने ईभी चार्जिङ स्टेसनमा क्षति पुगेको छ । भन्सार कार्यालय रसुवाको यार्ड र रसुवागढी हाइड्रोपावरको ड्याममा बाढीले क्षति पुर्‍याएको प्रहरीले जानकारी दिएको छ ।

बाढीका कारण रसुवाको गोसाइकुण्ड गाउँपालिका–५ पासाल्हामु सडकखण्डको धुन्चेदेखि टिमुरेसम्मको सडक पूर्ण अवरुद्ध भएको छ ।