कांग्रेसमा विशेष महाधिवेशन पक्षधरले बनाए विभिन्न समिति

News Summary

Generated by OK AI. Editorially reviewed.

नेपाली कांग्रेसको विशेष महाधिवेशन पक्षधर समूहले २७–२८ फागुनमा भृकुटीमण्डपमा विशेष महाधिवेशन गर्ने तयारी गरेको छ।
पक्षधर समूहले विभिन्न समितिहरू गठन गरी आवास, भोजनालय, युवा परिचालन, स्वयंसेवक परिचालन र यातायात व्यवस्थापन जिम्मा बाँडफाँट गरेको छ।
नेता मनोजमणि आचार्यले समितिहरू गठनबारे २२ पुसमा पत्रकार सम्मेलन गरेर जानकारी दिने बताउनुभयो।

२२ पुस, काठमाडौं । नेपाली कांग्रेसको विशेष महाधिवेशन पक्षधर समूहले विशेष महाधिवेशनको तयारीलाई तीव्रता दिएको छ । उक्त समूहले विशेष महाधिवेशनका लागि विभिन्न समितिहरू गठन गरेको छ ।

विशेष महाधिवेशन पक्षधरको मंगलबार बसेको बैठकले समितिहरू गठन गरेको नेता मनोजमणि आचार्यले जानकारी दिए ।

‘विभिन्न जिम्मेवारी बाँडफाँट गरेका छौं,’ उनले अनलाइनखबरसँग भने, ‘आजै पत्रकार ४ बजे पत्रकार सम्मेलन गरेर सार्वजनिक गर्छौं ।’

विशेष पक्षधर समूहले समिति गठनबारे विस्तृत जानकारी नदिए पनि स्रोतले आवास तथा भोजनालय समितिको जिम्मा कांग्रेस धादिङका पूर्वसभापति रमेश धमलालाई दिइएको छ ।

यस्तै भ्रातृ, शुभेच्छुक युवा परिचालनको जिम्मा केन्द्रीय सदस्य प्रतिमा गौतम र जनपरिचालन समिति संयोजकको जिम्मा नुवाकोट कांग्रेसका पूर्वसभापति जगदीश्वर नरसिंह केसीलाई दिइएको छ ।

स्वयंसेवक परिचालन समितिको जिम्मेवारी मनिष कोइराला र यातायात व्यवस्थापनमा माधव ढकालले पाएका छन् ।

विशेष पक्षधरले २७–२८ फागुनमा विशेष महाधिवेशन गर्ने तयारीस्वरूप भृकुटीमण्डप बुकिङ गरिसकेका छन् ।