विमलेन्द्र निधिमाथि दुर्व्यवहार भएको भन्दै रास्वपा प्रवक्ता झाले गरे निन्दा

News Summary

Generated by OK AI. Editorially reviewed.

राष्ट्रिय स्वतन्त्र पार्टीका प्रवक्ता मनिष झाले कांग्रेस उपसभापति विमलेन्द्र निधिमाथि दुर्व्यवहार भएको निन्दा गरेका छन्।
कांग्रेस केन्द्रीय कार्यालय सानेपामा विशेष महाधिवेशन पक्षधर कार्यकर्तासँग निधि नोकझोकमा परेका थिए।
झाले नेतृत्वमा नयाँ पुस्ताको दाबी स्वाभाविक भएपनि पुराना पुस्ताप्रति सम्मान कायम राख्नुपर्ने बताएका छन्।

२२ पुस, काठमाडौं । राष्ट्रिय स्वतन्त्र पार्टी (रास्वपा) का प्रवक्ता मनिष झाले नेपाली कांग्रेसका उपसभापति विमलेन्द्र निधिमाथि मंगलबार दुर्व्यवहार भएको भन्दै निन्दा गरेका छन् ।

कांग्रेस केन्द्रीय कार्यालय सानेपामा मंगलबार विशेष महाधिवेशन पक्षधर नेता कार्यकर्ताले प्रदर्शन गरिरहँदा उपसभापति निधिसँग नोकझोक भएको थियो ।

उक्त घटनापछि सामाजिक सञ्जालमा लेख्दै रास्वपा प्रवक्ता झाले नेतृत्वमा नयाँ पुस्ताले दाबी गर्नु स्वाभाविक भएपनि पुराना पुस्ताका नेताप्रति सम्मान कायम राख्नुपर्ने बताएका छन् ।

०७९ सालमा कांग्रेस परित्याग गरेर रास्वपा प्रवेश गरेका झाले लेखेका छन्, ‘नेतृत्व प्रतिको नयाँ पुस्ताको दाबी स्वाभाविक हो तर पुरानो पुस्ता प्रति सम्मान यथावत् रहनुपर्छ । तसर्थ आज ललितपुर सानेपास्थित काँग्रेस केन्द्रीय कार्यालयमा कांग्रेस नेता विमलेन्द्र निधी माथि भएको दुर्व्यवहार निन्दनीय छ । म खेद व्यक्त गर्दछु ।’

निधि र झा दुवै धनुषाका स्थायी बासिन्दा हुन् । ०७९ को प्रतिनिधिसभा निर्वाचनमा कांग्रेस नेता निधि लड्दै आएको धनुषा क्षेत्र नम्बर ३ मा झाले पनि आकांक्षा देखाएका थिए । तर, कांग्रेसले टिकट वितरणमा पैसा मागेको आरोप लगाउँदै झाले रास्वपा रोजेका थिए । रास्वपा प्रवेशपछि भने झा समानुपातिकतर्फबाट सांसद बनेका थिए ।