सांसद बनेकी अनुष्कालाई बधाई दिँदै ‘मिस नेपाल’ : धेरै युवतीका लागि प्रेरणादायी

News Summary

Generated by OK AI. Editorially reviewed.

मिस नेपाल वर्ल्ड २०१९ अनुष्का श्रेष्ठ राष्ट्रिय स्वतन्त्र पार्टीको समानुपातिक निर्वाचन प्रणालीमार्फत संघीय सांसद बनेकी छन्।
उनी सांसद बन्ने पहिलो मिस नेपाल हुन् र काठमाडौं महानगरकी सल्लाहकार समेत हुन्।
मिस नेपाल प्रतियोगिताका आयोजक संस्था 'द हिडन ट्रेजर'ले उनको उपलब्धिलाई 'महत्वपूर्ण उपलब्धि' भन्दै बधाई दिएको छ।

काठमाडौं । ‘मिस नेपाल वर्ल्ड २०१९’ अनुष्का श्रेष्ठ संघीय सांसद बनेकी छन् । उनी सांसद बन्ने पहिलो मिस नेपाल हुन् ।

सौन्दर्य प्रतियोगितामार्फत पहिचान बनाएकी श्रेष्ठ राष्ट्रिय स्वतन्त्र पार्टीको समानुपातिक निर्वाचन प्रणालीमार्फत आदिवासी जनजाति क्लस्टरमार्फत सांसद बनेकी हुन् ।

‘विथ अ पर्पस’ को अवधारणालाई निरन्तर अघि बढाउँदै आएकी उनले अब नीति निर्माण तहमा आफ्नो भूमिका विस्तार गरेकी छन् । उनी मिस नेपाल मात्र होइनन्, उद्यमी र काठमाडौं महानगरकी सल्लाहकार समेत हुन् ।

मिस नेपाल प्रतियोगिताका आयोजक संस्था ‘द हिडन ट्रेजर’ले श्रेष्ठको यस उपलब्धिप्रति बधाई तथा शुभकामना व्यक्त गरेको छ । संस्थाले सामाजिक सञ्जालमार्फत उनको उपलब्धिलाई ‘महत्वपूर्ण उपलब्धि’ भन्दै प्रशंसा गरेको हो ।

संस्थाले जारी सन्देशमा श्रेष्ठले सधैं उद्देश्यसहितको सौन्दर्यको परिभाषा प्रस्तुत गरेको उल्लेख गर्दै अब उनले उच्च तहको सेवामा त्यो प्रतिबद्धता पुर्‍याउने विश्वास व्यक्त गरेको छ । साथै, संसद्मा उनको दृष्टि र आवाज नेपालको लागि महत्वपूर्ण हुने पनि उल्लेख गरिएको छ ।

अनुष्काको यो उपलब्धिलाई नयाँ नेतृत्व यात्राको सुरुवातका रूपमा समेत हेरिएको छ । सौन्दर्य क्षेत्रबाट सार्वजनिक जीवनतर्फको उनको यात्रा धेरै युवतीका लागि प्रेरणादायी बन्ने अपेक्षा गरिएको छ ।