२०८३ असार २२ गते ८:१० 
२२ असार, काठमाडौं । फिफा विश्वकप २०२६ को अन्तिम १६ को खेलमा इंग्ल्यान्डले सहआयोजक मेक्सिको विरुद्ध ३-१ को अग्रता बनाएको छ ।
मेक्सिकोको घरेलु मेदान अज्टेका स्टेडियममा भइरहेको खेलमा कप्तान ह्यारी केनले ६०औं मिनेटमा पेनाल्टीमा गोल गरेपछि दश खेलाडीमा समेटिएको इंग्ल्यान्डले ३-१ को अग्रता बनाएको हो ।
जारी विश्वकपमा केनको यो छैटौं गोल हो । उनी सर्वाधिक गोलकर्तामा चौथो स्थानमा छन् । केनले समूह चरणमा क्रोएसिया विरुद्ध २ र पानामा विरुद्ध १ गोल गरेका थिए । यस्तै राउण्ड अफ ३२ मा केनले डिआर कंगो विरुद्ध २ गोल गरेका थिए ।
यस्तै समग्रमा भने विश्वकपमा केनको यो १४औं गोल हो । उनी विश्वकपमा सर्वाधिक गोल गर्नेमा संयुक्त रुपमा पाँचौ स्थानमा उक्लेका छन् ।
खराब मौसमका कारण मेक्सिको र इंग्ल्यान्डबीचको खेल एक घण्टा ढिला सुरु भएको थियो ।
इंग्ल्यान्डका जुड बेलिङहमले दुई मिनेट अन्तरमा दुई गोल गर्दै २-० को अग्रता दिलाएका थिए । त्यसपछि मेक्सिकोका जुलियन क्विनोनेसले गोल फर्काएका हुन् ।
बेलिङहमले ३६औं मिनेटमा बुकायो साकाको क्रसमा गोल गर्दै इंग्ल्यान्डलाई अग्रता दिलाएका थिए । त्यसको एक मिनेटपछि नै बेलिङहमले कप्तान ह्यारी केनको असिस्टमा गोल गर्दै इंग्ल्यान्डको अग्रता दोब्बर पारे ।
मेक्सिको विरुद्ध दुई गोल गरेपछि बेलिङहमको गोल संख्या ४ पुगेको छ । बेलिङहमले समूह चरणका क्रोएसिया र पानामा विरुद्ध एक-एक गोल गरेका थिए ।
दुई गोलले पछि परेको मेक्सिकोले पनि तत्कालै गोल फर्कायो । मेक्सिकोका जुलियन क्विनोनेसले ४२औं मिनेटमा गोल गर्दै गोल अन्तरमा कम पारेका हुन् । जारी विश्वकपमा क्विनोसको पनि यो चौथो गोल हो । उनले यसअघि समूह चरणमा दक्षिण अफ्रिका र चेक रपब्लिकबीच एक-एक गोल गरेका थिए भने राउण्ड अफ ३२ को खेलमा इक्वेडर विरुद्ध एक गोल गरेका थिए ।
४९औं मिनेट निको ओ’रेलीको प्रहार पोस्टमा लागेर फर्कँदा इंग्ल्यान्डले अग्रता बढाउने अवसर गुमाएको थियो ।
५४औं मिनेटमा जारेल क्वान्साहले मेक्सिकोका जेसस गालार्डोलाई खराब ट्याकल गरेपछि रातो कार्ड सामना गरेका थिए । रेफ्रीले भिएआरको सहयतामा उनलाई सिधै रातो कार्ड देखाएका हुन् ।
प्रतिक्रिया 4