२०८३ साउन २१ गते १५:१९ 
News Summary
Generated by OK AI. Editorially reviewed.- फिफाको निलम्बनका कारण नेपालको यू-२० फुटबल टोलीले एएफसी यू-२० एसियन कप छनोट प्रतियोगिता गुमाउने भएको छ ।
- एन्फामाथिको निलम्बन अगष्ट १ सम्म फुकुवा नभएकाले एएफसीले नेपालको नाम छनोट खेलको तालिकाबाट हटाएको छ ।
- फिफा निलम्बनले गर्दा नेपालले यसअघि नै एएफसी महिला च्याम्पियन्स लिग र यू-१७ महिला एसियन कप छनोट प्रतियोगिता पनि गुमाइसकेको छ ।
२१ साउन, काठमाडौं । पछिल्ला दिनमा फिफा निलम्बनको असर नेपाली फुटबलमा प्रष्ट रूपमा देखिएको छ । निलम्बनको पछिल्लो शिकार नेपालको उमेर समुहको फुटबल टोली बनेको छ ।
फिफा निलम्बनका लागि यही अगष्ट अन्तिम देखि सुरु हुने एएफसी यू-२० एसियन कप छनोटबाट नेपालको नाम हटेको छ । छनोटमा नेपाल डेपलपमेन्ट फेज अन्तर्गत समूह आईमा थियो ।
अब नेपालले यू-२० एसियन कप छनोट खेल्न पाउने छैन । यस छनोट प्रतियोगिता खेल्न अखिल नेपाल फुटबल संघ (एन्फा) माथि फिफाले लगाएको निलम्बन अगष्ट १ तारिखसम्म फुकुवा भइसक्नुपर्ने थियो ।
एएफसीले २७ जुनमै एन्फालाई पत्र पठाउँदै अगष्ट १ सम्म फिफाको निलम्बन फुकुवा भइसके मात्र नेपालले खेल्न पाउने अन्यथा नपाउने जानकारी गराएको थियो ।
तर निलम्बन कायम रहेको अवस्थामा अब नेपालले यू-२० एसियन कप छनोट खेल्न नपाउने भएको हो ।
सन् २०२७ मार्च-अप्रिलमा चीनमा हुने यस यू-२० एसियन कपका लागि यसअघि सार्वजनिक भएको ड्र मा नेपाल डेपलपमेन्ट फेजमा समूह आईमा थियो । यस समूहमा नेपालसँगै आयोजक मंगोलिया, ग्वाम र नर्दन मारिया आइल्यान्ड समावेश थिए । नेपालले अगष्ट ३१ मा ग्वाम सँग पहिलो खेल खेल्ने तालिका थियो ।
तर एएफसीले सार्वजनिक गरेको अपडेटेड ड्र अनुसार नेपालको नाम हटेको छ । यस्तै समूह ए मा रहेको फिलिपिन्सले पनि नखेल्ने भएको छ ।
यसअघि सन् २०२४ मा नेपालले एएफसी यू-२० एसियन कप छनोट खेल्दा समूह बी मा एक खेल जित्दा तीन खेलमा पराजित भएको थियो ।
निलम्बनपछि नेपालले गुमाउने पक्का भएको यू-२० एसियन कप छनोट तेस्रो प्रतियोगिता हो ।
फिफा निलम्बनका कारण नेपालले यसअघि नै एएफसी महिला च्याम्पियन्स लिग र एएफसी यू-१७ महिला एसियन कप छनोट प्रतियोगिता गुमाइसकेको छ ।
यस्तैगरी नोभेम्बर ४ देखि बंगलादेशमा हुने तय भएको साफ च्याम्पियनसिप फुटबलमा पनि नेपालको सहभागिता अन्योलमै छ ।
साफको लागि यसअघि नै ड्र भइसकेको छ र नेपालको नाम ड्र मा समावेश छैन ।
यदि सेप्टेम्बर १ तारिखसम्म नेपालको निलम्बन फुकुवा भएमा मात्र नेपाल साफ च्याम्पियनसिपको लागि समुह ए मा रहनेछ ।
प्रतिक्रिया 4