२०८१ चैत २८ गते १३:३४ 
२८ चैत, काठमाडौं । सन् २०२८ मा अमेरिकाको लस एन्जल्समा हुने ओलम्पिक खेलमा क्रिकेटलाई पनि समावेश गर्ने निर्णय यसअघि नै भइसकेको छ । तर टी-२०आई फर्म्याटमा हुने यस प्रतियोगितामा पुरुष र महिला दुवैतर्फ ६ टोलीको मात्र प्रतिस्पर्धा हुने भएको छ ।
ओलम्पिक खेल्ने ती ६ टोलीहरूको छनोट र योग्यता मापदण्डको बारेमा यथार्थमा भने अझै निर्णय आइसकेको छैन । अन्तर्राष्ट्रिय क्रिकेट परिषद् (आईसीसी)ले टी-२०आई वरियताका आधारमा टोली छनोट गराउन प्रस्ताव गरेको छ ।
ओलम्पिक क्रिकेटमा प्रत्येक टोलीले १५ सदस्यीय खेलाडीहरूको नामावली दिनुपर्नेछ, जसको कुल ९० खेलाडीको कोटा हुनेछ। यो संख्या विशेष रूपमा सीमित छ । यदि अमेरिका आयोजकको हिसाबले सिधै खेलेमा अन्य राष्ट्रहरूका लागि स्थानको संख्या घट्न सक्छ।
यस्तै क्यारिबियन क्षेत्रका वेस्ट इन्डिजको प्रतिनिधित्व कसरी हुनेछ भन्ने प्रश्न पनि उठेको छ। वेस्ट इन्डिजका टापुहरू ओलम्पिक खेलमा अलग-अलग देशको रूपमा सहभागी हुन्छन्, जसरी राष्ट्रमण्डल खेलहरूमा पनि यही व्यवस्था छ।
उदाहरणका लागि, सन् २०२२ को बर्मिङह्याम कमनवेल्थ खेलमा समावेश टी-२० क्रिकेटमा बारबाडोसले महिलाहरूको विधामा भाग लिएको थियो जबकि वेस्ट इन्डिजलाई प्रत्यक्ष स्थान प्राप्त भएको थियो र बारबाडोसलाई वेस्ट इन्डसज टी२० ब्लेजको च्याम्पियनको रूपमा चयन गरिएको थियो। यसले वेस्ट इन्डिजको प्रतिनिधित्वको विषयमा केही जटिलता सिर्जना गरेको छ।
टोलीहरूको छनोटबारे अन्तिम निर्णय भने यसै वर्षको अन्त्यसम्म लिइसकिने जनाइएको छ ।
-एजेन्सीबाट
प्रतिक्रिया 4