केही दिन अगाडि मात्र यूरोप उड्दै गर्दा त्रिभुवन विमानस्थलमा भेटिएकी नायिका सुहाना थापालाई मिडियाकर्मीको प्रश्न थियो, के तपाई बाहिरी ब्यानरमा खेल्न चाहनुहुन्न ? घरबाटै निर्माण भएको चलचित्र ‘ए मेरो हजुर ३’ खेलेपछि चर्चामा रहेकी सुहानाले दोश्रो प्रोजेक्ट पनि घरकै खेल्ने तयारी गरेकी छिन् । तर, यो विचमा उनलाई बाहिरी ब्यानरबाट अफर नआएको भने होइन ।
सुहानाले विमानस्थलमा मिडियाकर्मीसँग भनेकी थिइन्–‘केही दिन अगाडि एउटा फोन आएको थियो । ड्याडीले छोरी अहिले पढ्दै छ भनेर फोन राख्दिनुभयो ।’ यसको अर्थ, सुहानालाई अहिले नै झरना र निर्माता सुनिलकुमार थापा बाहिरी ब्यानरको चलचित्र खेलाउने मनस्थितीमा छैनन् ।
सुहाना भने आफू बाहिरी ब्यानरका चलचित्रमा पनि काम गर्न तयार भएको बताउँछिन् । चलचित्र ‘ए मेरो हजुर ३’को अहिले ओभरसिज प्रदर्शन भैरहेको छ । यसका लागि झरना र सुहाना यूरोपमा छन् ।
