२७ पुस, काठमाडौं । बिहीबार सन्तोष साहुखलले नेपाली शीर्ष श्रेणीको लिगमा एक सय गोलको कीर्तिमान बनाए । शहीद स्मारक ए डिभिजन लिगमा सय गोल पूरा गर्ने सन्तोष पहिलो खेलाडी हुन् । तर सन्तोस साहुखल अहिले राष्ट्रिय टिमका स्ट्राकर होइनन् । सन् २०१५ यता राष्ट्रिय टिममा छैनन् । तर लिगमा राम्रो खेलिरहेका उनी ५ गोल गर्दै सर्वाधिक गोलकर्तामा अगाडि छन् ।
उसो भए नेपाली राष्ट्रिय टिममा चार स्ट्राइकर कहाँ छन् त ? पहिला उनीहरुको कुरा गरौं ।
लिगको पाँचौ चरणको खेल सकिँदा ७० गोल भयो । तर राष्ट्रिय टिममा स्ट्राकरहरु भरत खवास, नवयुग श्रेष्ठ र अभिषेक रिजालको गोल जोड्दा ४ मात्र हुन्छ । अर्का एक स्ट्राकर विमल मगरले भने निलम्बनका कारण लिग खेल्न पाएका छैनन् ।
भरत नेपाल आर्मीका कप्तान हुन् । नवयुग पनि आर्मीबाटै खेल्छन् । युवा फरवार्ड अभिषेक मच्छिन्द्र कलबबाट खेल्छन् । राष्ट्रिय टिमका फरवार्ड रहेका नवयुगले दुई गोल गर्दा भरत र अभिषेकले समान एक-एक गोल गरेका छन् ।
बरु नेपालको राष्ट्रिय टिममा खेलिसकेका, तर हाल टिममा नरहेका नेपाल पुलिसका सुमन लामाले चार तथा मनाङ मर्स्याङ्दीका विमल रानाले ३ गोल गरेका छन् ।
राष्ट्रिय टिमका फवार्डहरुले नै लिगमा गोल गर्न नसक्नु सुखद होइन ।
नेपाली स्ट्राइकर किन चुक्छन् त ? आफ्नो लेभलअनुसार खेल्न नसकेर अनि पाएको मौका सदुपयोग गर्न नसकेर । फुटबल विश्लेषक सन्जिव मिश्रको भनाइ पनि यही छ ।
‘आफ्नो लेभलअनुसार स्ट्राइकरले जसरी पेनाल्टी एरियामा बल पाउँछ, त्यसरी गोलमा कन्भर्ट गर्न नसक्नु पनि गोल धेरै नहुनुको अर्को कारण हो,’ मिश्रले भने ।
नेपाल आर्मीका प्रशिक्षक नवीन न्यौपाने पनि नयाँ खेलाडीहरुले गोल गर्नुपर्ने भए पनि नसकेको बताउँछन् । उनी भन्छन्, ‘सन्तोषजस्ता पुराना खेलाडीहरुले गोल गरिरहेका छन् । तर नयाँ खेलाडीहरुले गोल गर्न सकेका छैनन् ।’
ए डिभिजन लिगका निर्देशकसमेत रहेका फुटबल विश्लेषक मिश्रले लिगमा गोल संख्या कम हुनुको एउटा कारण मिडफिल्डले गोलको अवसर नै बनाउन नसकेको पनि बताउँछन् । ‘केही टिमको सट पास, बल पोसेसन राम्रो छ,’ मिश्र भन्छन्, ‘तर त्यहाँ पनि समस्या छ । गोल हुन बलको क्रिएसनको अभाव छ । कतिपय क्लबले राम्रो अवसर नै बनाउन सकेका छैनन् ।’
एक त अवसर नै कम सृजना भएको बेला स्ट्राइकरहरु फिनिसिङमा पनि निरन्तर चुकिरहेका छन् । ‘गोल त्यति सजिलै हुने होइन, तैपनि यो सिजन सोचेअनुसार गोल हुन सकेको छैन । स्ट्राइकरहरु फिनिसिङमा चुकिरहेका छन्,’ मिश्रले भने ।
कुनै जमाना थियो ए डिभिजन लिगमा कसले बढी गोल गर्ने तछाडमछाड हुन्थ्यो । बसन्त थापा, हरि खड्का, निराजन रायमाझी, सुरेन्द्र तामाङ अनि सन्तोष साहुखल पनि लिगमा कसले बढी गोल गर्ने भनेर प्रतिस्पर्धामा हुन्थे । त्यसबेला स्ट्राइकरले पाएको अवसर खेर फाल्दैनथे । गोल पनि निस्किन्थ्यो ।
पुराना दिन सम्झिँदै आर्मीका प्रशिक्षक नवीन न्यौपाने भन्छन्, ‘उनीहरुले पाएको अवसर मिस गर्दैनथे । हरि दाइ, सुरेन्द्रहरु गोल गरिहाल्थे । पछि भरत आए । तर यो सिजन उसले पनि पहिला जसरी स्कोर गररिरहेका थिए, त्यो भएन ।’
नवयुगको हकमा पनि एकताका माथिल्लो स्तरमा गोलहरु गरेको तर अहिले नसकेको उनले सुनाए ।
कसरी हुनसक्छ धेरै गोल ?
पूर्वफुटबलर समेत रहेका प्रशिक्षक नवीनकाअनुसार नाम चलेका खेलाडीहरुबाट नै गोलको अपेक्षा हुन्छ । र, उनीहरुले नै अवसर पाउँदा सदुपयोग गर्नुपर्छ । त्यसका लागि स्ट्राइकरहरु खेलभन्दा अघि ट्रेनिङमा समेत ध्यान दिनुपर्ने र त्यही ट्रेनिङको कमाल खेलमा देखिने न्यौपानेले बताए ।
नेपाल पुलिसका प्रशिक्षक अनन्त थापाले शुरुवाती दुई खेलमा गोल गर्न नसकेपछि टिममा म्याचुएर्ड स्ट्राइकरको कमी भएको प्रतिक्रिया दिएका थिए । त्यसपछि पुलिसले तीनमध्ये दुई खेलमा जित हात पारेको छ, जसमा सुमन लामा एक्लैले चार गोल गरेका छन् । च्यासलका लागि सन्तोष एक्लैले ५ गोल गर्दा गोल गर्ने अन्य खेलाडीले भने उनलाई पछ्याउन सकेका छैनन् । सन्तोषका दाइसमेत रहेका च्यासलका प्रशिक्षक बालगोपाल साहुखलले पनि नेपालमा गोल गर्ने स्ट्राइकरकै अभाव रहेको बताउँछन् ।
सर्वाधिक गोलकर्ता
सन्तोष साहुखल : ५ गोल
सुमन लामा : ४ गोल
सोमिडे एडालेजा, विमल राना, आशिष लामा : ३ गोल
सरोज तामाङ, ड्याड्डी जुनिएर वाम्बा, जुनिएर निकेनगुए, नवयुग श्रेष्ठ, अनन्त तामाङ, लक्ष्मण रुचाल, रोशन रानामगर, अजयी मार्टिन्स कोयोडो : २ गोल