२०७८ साउन १२ गते १५:२६ 
१२ साउन, काठमाडौं । जापानको राजधानी सहर टोकियोमा जारी ओलम्पिकमा सुडानका जुडो खेलाडी मोहम्मद अब्दुलरसुलले इजरायली खेलाडीसँग खेल्न अस्वीकार गरेका छन् ।
इजरायली खेलाडी तोहार बुत्बुलसँग आमने सामने हुने भएसँगै अब्दुलरसुलले आफ्नो नाम फिर्ता लिएका हुन् । ७२ केजीको समूहको अन्तिम १६ को खेलमा अब्दुलरसुलले इजरायली खेलाडीसँग खेल्न अस्वीकार गरेका हुन् ।
अधिकारिकरुपमा उनले आफ्नो काँधको चोटको कारण नाम फिर्ता लिएको बताएका छन् । तर, अन्तिम समयमा आएर नाम फिर्ता लिनुले भने आशंका बढाएको छ । यसअघि अल्जेरियाका फेती नौरिनेले बुत्बुलको सामना गर्नुपर्ने भएसँगै आफ्नो नाम फिर्ता लिएका थिए । उनले प्यालेस्टाइनको समर्थनमा इजरायली खेलाडीसँग प्रतिस्पर्धा त्याग्ने निर्णय गरेको बताएका थिए ।
अल्जेरियाले इजरायलसँग दौत्य सम्बन्ध कायम भएको छैन । तर, सुडानको भने इजरायलसँग दौत्य सम्बन्ध कायम छ । गत जनवरीमा सुडानले इजरायलसँग दौत्य सम्बन्ध कायम गरेको थियो तर यो निर्णयको सुडानमा भने व्यापक विरोध भएको थियो ।
‘कहिलेकाहीँ जुडोमा यस्ता घटनाहरु हुन्छन् । यो मेरो लागि नौलो कुरा होइन । यस्ता घटनाहरु इजरायली एथ्लेटहरुसँग हुँदै आएको छ तर म राजनीतिको विषयमा बहस गर्न चाहन्नँ’, इजरायली खेलाडी बुत्बुलले भने ।
एजेन्सीहरुको सहयोगमा
प्रतिक्रिया 4