चुनावको भीडभाडले कोरोना संक्रमण बढ्न सक्छ ?

नेताहरु घर–दैलोमा पुगेर भोट माग्न आए । मतदानका लागि आह्वान गरे । तर, भीडभाडको कारण फैलन सक्ने कोरोनाको संभावित जोखिमबारे सर्तक गराएनन् । त्यसैले मत हाल्नका लागि भीड त उर्लियो तर स्वास्थ्य सचेतना देखिएन ।

अहिले नेपालमा कोरोना संक्रमितको संख्या न्युन छ । ५० को हाराहारीमा संक्रमित छन् । यही कारण पनि कोरोनाप्रति मान्छेहरुमा भय हटेको हुनसक्ने नेपाल चिकित्सक संघका अध्यक्ष डा. लोचन कार्की बताउँछन् ।

‘तर, कोभिड छैन भनेर बेवास्ता गर्दा भारतमा जस्तै चुनाव पछि नै कोरोना संक्रमितको संख्या अनपेक्षित रुपमा बढ्न सक्छ’ डा. कार्की भन्छन् ।

मुलुकमा निर्वाचन सुरु हुनुअघि यसको संभावित जोखिमबारे आफुले सम्बन्धित निकायलाई सर्तक गराएको उनले बताए । निर्वाचनको बेला भेला हुने, भोज भत्तेर गर्ने, भीडभाड हुने भएकाले यस्तो अवस्थामा कोरोना संक्रमण फैलन सक्ने भन्दै स्वास्थ्य मन्त्रालयमा ध्यानाकर्षण गराएको तर उनीहरुले खासै ध्यान नदिएको डा. लोचनको भनाई छ ।

‘मैले धेरै मिडियामा यो कुरा भन्दै आएको थिएँ । छिमेकी मुलुकमा कोरोना बढिरहेको बेला खुल्ला सिमाना भएकोले नेपालमा पनि कोरोना संक्रमित बढ्न सक्छ । एक जना मात्र कोरोना संक्रमित पनि धेरै भिडभाडमा जाँदा धेरैलाई कोरोना सल्काउँछ त्यसैले स्वास्थ्य मापदण्डलाई सबैले ध्यान दिनुपर्छ ।’

राजनीतिक दल तथा उनका नेताहरूले जनस्वास्थ्यप्रति खासै चासो नदेखाएको उनको टिप्पणी छ । भोट माग्ने नेताहरूले भीडभाडामा स्वास्थ्य सुरक्षा अपनाउनुपर्छ भनेर ख्याल गरेनन् । मतदान स्थलमा भौतिक दूरी वा मास्कको प्रबन्ध गरिएन । यद्यपि मतदान स्थल खुला स्थानमा भएकाले संक्रमण फैलने भय कम रहेको सरुवा रोग विशेषज्ञ डा. अनुप बास्तोला बताउँछन् ।

मतदानपछिको अवस्थामा मतगणना गर्दा, विजय उत्सव मनाउँदा, भोज भत्तेर गर्दा कोरोना संक्रमण सर्न सक्ने उनले औंल्याए । ‘एक हिसाबले त हामी सुरक्षित नै छौं । तर, हेलचेक्राई गर्ने बेला भएको छैन । अझैपनि स्वास्थ्य सचेतना अपनाउनै पर्छ’ डा. अनुप बास्तोला भन्छन् ।

पहिलो, दोस्रो र तेस्रो भेरियन्टमा धेरै संक्रमित भए । मान्छेमा रोग प्रतिरोधात्मक क्षमता बढेको छ । अधिकांशले खोप पनि लगाइसकेका छन् । त्यसैले भयभित हुनुपर्ने स्थिती छैन ।