वडाध्यक्षलाई पोखरीमा धकेल्ने डीएसपीलाई कारवाही गर्न माग

२ साउन, बुटवल । रुपन्देहीको तिलोत्तमा नगरपालिकाको एक वडाध्यक्षलाई पौडी पोखरीमा धकेल्ने प्रहरी अधिकारीलाई नेकपा एमालेले कारबाही गर्न माग गरेको छ ।

आइतबार नगरसभा स्थगित गरेको विरोधमा नेकपा एमालेबाट निर्वाचित जनप्रतिनिधिले विरोध प्रदर्शन गरेका थिए । त्यस क्रममा इलाका प्रहरी कार्यालय बुटवलका प्रमुख डीएसपी ठगबहादुर केसीले वडा नंं ४ का वडाध्यक्ष हरिबहादुर क्षेत्रीलाई धकेल्दै मणिग्राम पार्टी प्यालेसको पौडी पोखरीमा चोबलेको भिडियो सामाजिक सञ्जालमा सार्वजनिक भएको थियो ।

त्यस क्रममा रुपन्देहीका प्रहरी प्रमुख प्रहरी उपरीक्षक रवीन्द्र रेग्मीले पनि जनप्रतिनिधिलाई धकेलेका थिए ।

उक्त घटनाको भर्त्सना गर्दै नेकपा एमाले रुपन्देहीले डीएसपी केसी र नगरपालिकाका प्रमुख प्रशासकीय अधिकृत जीवन ज्ञवालीलाई कारवाही गर्न प्रमुख जिल्ला अधिकारीसमक्ष माग गरेको छ । सोमबार ज्ञापन पत्र लिएर जिल्लास्तरीय नेता र तिलोत्तमा नगरपालिकामा एमालेबाट निर्वाचित जनप्रतिनिधि जिल्ला प्रशासन कार्यालय पुगेका थिए ।

प्रमुख प्रशासकीय अधिकृत ज्ञवालीले नेपाली कांग्रेसबाट निर्वाचित नगर प्रमुख रामकृष्ण खांणसंग मिलेर गणपूरक संख्या पुग्न नदिन कांग्रेसबाट निर्वाचित जनप्रतिनिधिको हस्ताक्षर गराउने र एमालेबाट निर्वाचित जनप्रतिनिधिलाई हस्ताक्षर गर्न नदिएको एमालेको आरोप छ ।

नेकपा एमालेका जनप्रतिनिधिहरुले प्रमुख प्रशासकीय अधिकृत जीवन ज्ञवालीलाई पार्टी प्यालेसको एउटा हलबाट अर्को हलमा जान अवरोध गर्ने क्रममा डीएसपी केसीले वडाध्यक्ष क्षेत्रीलाई धकेलेर पोखरीमा हुत्याएका थिए ।

नगरसभामा एमालेका ४८ जना जनप्रतिनिधि उपस्थित भएपनि ४२ जनाले हस्ताक्षर गरेपछि माइन्यूट लुकाइएको र कांग्रेसका जनप्रतिनिधि उपस्थित भएर पनि उपस्थिति नगराई मेयरको मात्र हस्ताक्षर गराई फर्जी हिसाबले गणपुरक नपुगेको देखाएर नगरसभा स्थगित गरिएको एमालेको आरोप छ ।

वडाध्यक्ष क्षेत्रीले डीएसपी केसीले आफूहरुमाथि अभद्र व्यवहार र अन्याय भएको भन्दै उनीमाथि कारवाही हुनुपर्ने माग गरे । ‘शान्ति सुरक्षा दिने डीएसपीले अभद्र व्यवहार र ज्यादती गरेका छन्’, वडाध्यक्ष क्षेत्रीले भने, ‘धन्न पोखरी धेरै गहिरो नभएकाले बाँचियो, गहिरो भएको भए ज्यान जान पनि सक्थ्यो, यस्तो हर्कत गर्नेलाई कारवाही हुनुपर्छ ।’

रुपन्देहीका प्रहरी प्रमुख प्रहरी उपरीक्षक रवीन्द्र रेग्मीले प्रमुख प्रशासकीय अधिकृतलाई सुरक्षा दिने क्रममा बाटो पन्छाउन खोज्दा घटना भएको बताए । ‘प्रमुख प्रशासकीय अधिकृतलाई रेस्क्यु गर्ने क्रममा बाटो पन्छाउँदा घटना भयो’–प्रहरी उपरीक्षक रेग्मीले भने, ‘त्यस्तो अवस्थामा प्रहरीले अरु के गर्न मिल्छ र ?’

गत असार १० गते प्रस्तुत गरिएको तिलोत्तमा नगरपालिकाको बजेट पारितको लागि उपप्रमुख जगेश्वरदेवी चौधरीले असार २१ गतेको लागि नगरसभा आह्वान गरेकी थिइन् ।

तर नगर प्रमुख खाणले २१ गतेको नगरसभालाई २६ गते र त्यसपछि ३१ गतेका लागि सारेका थिए । गणपूरक संख्या नपुगेको भन्दै ३१ गतेको बैठक स्थगित गरेका नगर प्रमुख खाणले आइतबारको बैठक पनि स्थगित गरी सोमबारको बैठकमा अल्पमतमै बजेट पास गर्ने योजनामा रहेको उपप्रमुख चौधरीले बताइन् ।

एमालेका जनप्रतिनिधिले बजेटसँगै न्यायिक समिति, लेखा समिति, विधायन समिति र सुशासन समिति समेत नगरसभाले पारित गर्नुपर्ने कानुनी व्यवस्था भएकाले यी विषयलाई पनि कार्यसूचीमा राख्नुपर्ने अडान लिएका थिए । तर नगरप्रमुख खाण नगरसभाबाट बजेटमात्रै पारित गराउने योजनामा रहेकाले विवाद उत्पन्न भएको एमालेको दावी छ ।

एमाले लुम्बिनी प्रदेश कमिटी सदस्य मोहन चापागाईंले गृहमन्त्री बालकृष्ण खाँणको गृहनगरमा प्रहरी÷प्रशासन लगायर वडाध्यक्षमाथि कुटपिट गर्ने प्रहरी अधिकारीमाथि तत्काल निलम्बन गर्नुपर्ने माग गरे ।

हेर्नुहोस् एमालेको ज्ञापनपत्र