राज्यमन्त्रीको अफर नकारे, तेस्रोपल्ट चुनाव जितेर मन्त्री बने

३ माघ, विराटनगर । मोरङ ४ बाट निर्वाचित अमनलाल मोदी संघीय मामिला तथा सामान्य प्रशासन मन्त्री बनेका छन् । तेस्रो पटक सांसद निर्वाचित भएका मोदीले ३७ वर्षमै मन्त्री बन्ने अवसर पाए ।

२८ वर्षको उमेरमा समानुपातिक पद्धतिबाट संविधानसभा सदस्य बनेका उनी लगातार संसदमा प्रतिनिधित्व गर्ने माओवादी केन्द्रका कान्छा सांसद हुन् । २०७४ सालको निर्वाचनमा तत्कालीन बाम गठबन्धनबाट उम्मेदवार बनेका उनले कांग्रेस नेता तथा पूर्वमन्त्री महेश आचार्यलाई पराजित गरेका थिए ।

मंसिर ४ को निर्वाचनमा माओवादी– कांग्रेस गठबन्धनबाट उम्मेदवार बनेका उनले एमाले उम्मेदवार विनोद ढकाललाई पराजित गरेका थिए ।

माओवादी केन्द्रका नेता अमनलाल मोदीलाई शेरबहादुर देउवा नेतृत्वको अघिल्लो सरकारमा राज्यमन्त्री बन्न प्रस्ताव आएको थियो । तर उनले आफू क्याबिनेट मन्त्री नै बन्ने भन्दै राज्यमन्त्रीको प्रस्ताव अस्वीकार गरे । उनका सहयोगी ताजिम अन्सारी भन्छन्, ‘अघिल्लो पटक राज्यमन्त्री बन्ने पार्टीको प्रस्ताव आउँदा उहाँ जानुभएन ।’

भुइँबाट उठेका नेता

पवनलाल र बालोदेवी मोदीका सात सन्तानमध्ये अमनलाल कान्छा हुन् । विपन्न परिवारमा जन्मिएका मोदी ७ वर्षको हुँदा बुबा पवनलालको मृत्यु भयो । खान लाउनैकै लागि संघर्ष गरिरहेको परिवारका अभिभावक बितेपछि अमनलाल स्कुल जान पनि सजिलो भएन ।

विहान बेलुका फ्याक्ट्रीमा काम गरेर उनले एसएलसीसम्मको पढाई पूरा गरे । उनकी आमा बालोदेवीले सन्तान हुर्काउन छिमेकमा बनिबुतोसँगै हाटबजारमा आलुचप बेच्ने काम पनि गरिन् । शारीरिक रुपमा कमजोर भएपछि उनले गत वर्षबाट हाटबजारमा आलुचप बेच्न छाडेकी थिइन् । अमनका दाजु सुनसरीको दुहबीमा पसल चलाउँछन् ।

२०५६ सालमा कक्षा ९ मा पढ्दा माओवादीको विद्यार्थी संगठन अखिल क्रान्तिकारीमा आवद्ध भएका मोदी महेन्द्र मोरङ क्याम्पसमा आईए पढ्न सुरु गरेपछि राजनीतिमा सक्रिय भए । क्याम्पसमा पढाई खर्च जुटाउन विराटनगरका होटलहरुमा वेटर र क्लिनरको कामसमेत गरे ।

२०६० सालमा पक्राउ परेका उनी दुई वर्ष तीन महिना कारागार बसेपछि रिहा भए । अखिल क्रान्तिकारीको जिल्ला सदस्य हुँदै मोरङ अध्यक्ष भएका उनी तत्कालिन माओवादी केन्द्रको जिल्ला कमिटी सदस्य हुँदै राज्य कमिटी सदस्य बनेका थिए ।

२०७४ पछि माओवादी केन्द्र र नेकपा एमालेबीच पार्टी एकता हुँदा उनी नेकपाको प्रदेश कमिटी सदस्य बने । माओवादी केन्द्रको आठौं महाधिवेशनबाट केन्द्रीय सदस्य बने ।

२०७० सालको दोस्रो संविधानसभामा समानुपातिक संसद निर्वाचित भएका मोदी २०७४ सालको निर्वाचनमा मोरङ–४ बाट निर्वाचित भए । गत ४ मंसिरमा पनि उनी सोही क्षेत्रबाट निर्वाचित भए । उनी निर्वाचित भएको क्षेत्र थारु बहुल क्षेत्र हो ।

यो पनि पढ्नुस् :