छाला किन चिलाउँछ ?

२०८० वैशाख २७ गते १४:४०

छाला शरीरको बाहिरी तह हो, जसले शरीरलाई विभिन्न संक्रमणबाट जोगाउँछ । छाला चिलाउने धेरैले भोगिरहेको समस्या हो । तर प्रायःले यसलाई सामान्य रुपमा लिइरहेको देखिन्छ ।

छाला मुख्यतः दुई कारणले चिलाउने गर्छ, बाहिर र भित्र । कलेजोसम्बन्धी रोग, मिर्गौला फेल हुँदा, रक्तअल्पता, गलगाँडको समस्या, क्यान्सर, मधुमेह, थाइराइडलगायत भित्री समस्या कारण छाला चिलाउँछ ।

छाला चिलाउने बाहिरी कारणमा फुस्रो सुख्खा छाला हुँदा, छालासम्बन्धी रोग, परजीवीले टोक्दा, संक्रमण, गर्भधारण पर्छन् ।

साबुनले जीउ नुहाउँदा पनि छाला सुख्खा हुन्छ । पाको उमेरमा धेरै नुहाउनु र आगो धेरै ताप्दा छाला सुख्खा हुन्छ । जसकारण छाला चिलाउँछ । एक्जिमा, लुतो, दाद, चाया, धमौरा आउँदा छाला चिलाउँछ । कस्मेटिक्सका सामान, रबर, गरगहना, ऊन, औषधि, चर्को घाम र धुलोधुवाँका कारण एलर्जी हुँदा छाला चिलाउँछ ।

यसैगरी लुतो, जुम्रा, उपियाँ, उडुस, जुकाजस्ता परजीवीको टोकाइ छाला चिलाउने एक कारण हो । कीरा, फट्यांग्रा, लामखुट्टे, मौरीको टोकाइले पनि छाला चिलाउँछ । ठेउला, जनैखटिरा, अन्य भाइरस, फंगसजन्य रोग, दाद, हिलोले पनि छाला चिलाउँछ । गर्भावस्थामा शरीरमा हुने हार्मोनल परिवर्तन पनि छाला चिलाउने एउटा कारण हो ।

उपचार

सामान्य रुपमा चिलाएको छ र कन्याएपछि आराम मिलेको छ भने चिकित्सकलाई देखाउन जरुरी हुँदैन । तर जीउ चिलाउने, डाबर देखिने, ज्वरो आउने, दुब्लाउने जस्ता लक्षण देखिएमा भने चिकित्सकलाई जाँच गराइहाल्नुपर्छ ।

विभिन्न कारणले छाला चिलाउने भएकाले यसको उपचारको प्रकृति पनि फरक नै हुन्छ । कुनै औषधि लगाउँदा मात्रै पनि ठीक हुन्छ भने कुनैमा खाने औषधि पनि दिइन्छ । कतिपय छालासम्बन्धी समस्या मलम वा क्रिम लगाउँदा पनि ठीक हुन्छ । अलि गम्भीर प्रकृतिको चिलाउने समस्या छ भने चाहिं अस्पताल नै भर्ना गरेर उपचार गर्नुपर्ने हुन्छ ।

छाला चिलाउने समस्याबाट कसरी बच्ने ?

कडाखालको साबुनको प्रयोग कम गर्ने, ऊनको कपडा प्रयोग नगर्ने, हिटर र एसीको लामो समयसम्म प्रयोग नगर्ने गर्नुपर्छ । पर्याप्त मात्रामा पानी, फलफूल, सागसब्जी खाने, घाममा निस्किंदा सनस्क्रिम वा मोस्चराइजिङ क्रिमको प्रयोग गर्ने गरे छालामा सुख्खा आउँदैन र चिलाउने समस्याबाट पनि बच्न सकिन्छ ।

(छाला तथा यौनरोग विशेषज्ञ डा. कार्कीसँग अनलाइनखबरकर्मी रेणु त्वानाबासुले गरेको कुराकानीमा आधारित)