बच्चा जन्मिएपछि महिलाको यौनाङ्गमा आउनसक्छ परिवर्तन, के छ उपचार ?  (भिडियो)

गर्भावस्था प्राकृतिक प्रक्रिया हो । तर गर्भावस्थाको समयमा महिलाको शरीरमा विभिन्न प्रकारको परिवर्तन आउँछ । यो बेला धेरै प्रकारको हर्मोनल परिवर्तन हुन्छ । गर्भावस्थासँगै प्रसवपछि महिलाको शरीरको विभिन्न अंगमा धेरै परिवर्तन आउँछ । शरीरको परिवर्तनसँगै यौनाङ्गमा पनि परिवर्तन हुन्छ ।

लामो समय व्यथा लागेको, ठूलो बच्चा जन्मिएको, उपकरणको सहायताबाट सुत्केरी गराउनु परेको खण्डमा महिलाको यौनाङ्गमा थप परिवर्तन आउन सक्छ ।

सामान्य प्रसवपछि परिवर्तन भएको शरीर र खुकुलो भएको यौनाङ्ग ६ हप्ताभित्रमा बिस्तारै गर्भपूर्वको अवस्थामा फर्किंदै जान्छ । तर कतिपय महिलाहरूमा भने विभिन्न कारणले गर्दा शरीरको अङ्ग पुरानो अवस्थामा फर्किन सक्दैन ।

यौनाङ्गको परिवर्तन

प्रसवको बेला सबै कुरा सामान्य भएर केही जटिलता नभएपनि विभिन्न हर्मोनल परिवर्तनले महिलाको यौनाङ्गमा परिवर्तन हुन्छ । त्यस्ता परिवर्तनकै कारण महिलामा पिसाब चुहिने समस्या पनि देखा पर्न सक्छ ।

धेरै बच्चा जन्माएका महिलालाई पिसाब चुहिने समस्याले झन् धेरै सताउँछ । यो समस्या कतिपयमा प्रसवको ६ हप्तापछि आफैं समाधान हुन्छ भने कतिपयमा पछिसम्म पनि रहन्छ । उमेर बढ्दै गएपछि यो समस्या झन् बढ्दै जान सक्छ ।

यौन जीवनमा प्रभाव

प्रसवपछिका यी शारीरिक परिवर्तनलाई कसैले सामान्य रुपमा लिन्छन् । किनकि यसले उनीहरूको यौन जीवनमा पनि खासै समस्या ल्याउँदैन । तर कसैले भने यो परिवर्तनलाई सामान्य रुपमा लिन सक्दैनन् । परिवर्तनका कारण नै मेरो यौन जीवन बिग्रिने हो कि भनेर सोच्छन् । जसले गर्दा केही समस्या हुनसक्छ ।

यौनाङ्गलाई आकर्षक बनाउन जरुरी छ ?

खुकुलो भएको यौनाङ्गलाई सामान्य अवस्थामा फर्काउन पछिल्लो समय कस्मेटिक गाइनोकोलोजी तथा एस्थेटिक गाइनोकोलोजी प्रविधि पनि नेपालमा भित्रिएको छ ।

विश्वमा त यो धेरै प्रचलनमा छ । नेपालमा भने यो प्रविधि भित्रिएको एक वर्ष हुँदैछ । यो प्रविधिमा शल्यक्रिया र शल्यक्रियाविना खुकुलो भएको यौनाङ्गलाई कसिलो बनाउने गरिन्छ ।

यौनाङ्ग धेरै खुकुलो भएको कारण पिसाब चुहिने समस्या भएको छ भने कस्मेटिक शल्यक्रिया गरेर समाधान गर्न सकिन्छ । यौनाङ्गको आकारमा भएको परिवर्तनलाई मिलाउन पनि कस्मेटिक गाइनोकोलोजी उपयोगी हुन्छ ।

लेजरको माध्यमबाट खुकुलो भएको यौनाङ्गलाई कसिलो बनाउने, कालो भएको यौनाङ्गलाई सेतो बनाउन एस्थेटिक गाइनोकोलोजी उपयोगी हुन्छ । महिनावारी सुक्ने बेला र सुकिसकेपछि हर्मोनको गडबडीका कारण यौनाङ्ग सुक्खा हुने समस्या पनि देखिन्छ । त्यसको उपचार पनि लेजर मार्फत उपचार गर्न सकिन्छ ।

यो उपचार कति जटिल ?

यो समस्याको उपचार गर्नुपर्छ र उपचारको सजिलो उपाय नेपालमा छ भन्ने कुरा नै धेरैलाई थाहा छैन । थाहा भए पनि यौनाङ्गको समस्याबारे महिला कुरा नै गर्न हिच्किचाउँछन् ।

यौनाङ्ग खुकुलो भएको छ र त्यसलाई कसिलो बनाउने उपचार धेरै जटिल हुँदैन । शल्यक्रिया विना सहजै लेजर मार्फत उपचार गर्न सकिन्छ । तर आकारप्रकार नै परिवर्तन भएको यौनाङ्गलाई सामान्य अवस्थामा ल्याउन गरिने शल्यक्रिया भने अलि जटिल खालको हुन्छ ।

कति लाग्छ खर्च ?

एस्थेटिक गाइनोकोजोली शल्यक्रिया विना गरिने उपचार हो । त्यसैले लेजर गरेको भोलिपल्ट नै महिला सामान्य अवस्थामा फर्किन्छन् । यो उपचार गर्नका लागि ५० हजारदेखि एक लाख ५० हजार रुपैयाँसम्म खर्च लाग्न सक्छ ।

तस्वीर, भिडियो : शंकर गिरी/अनलाइनखबर