जेनजी घाइतेकी दिदी सांसद बन्दै, भन्छिन् : शहीद–घाइतेको अभिभावक बन्छु

मुकेश र आकृति अवस्थी ।

News Summary

Generated by OK AI. Editorially reviewed.

राष्ट्रिय स्वतन्त्र पार्टीले जेनजी आन्दोलनका घाइते मुकेश अवस्थीकी दिदी आकृति अवस्थीलाई समानुपातिक सांसदका लागि निर्वाचन आयोगमा सिफारिस गरेको छ।
आकृति अवस्थीले जेनजीले उठाएको भ्रष्टाचार अन्त्य र सुशासनका लागि सदनमा आवाज उठाउने बताउनुभयो।
मुकेश अवस्थीले आन्दोलनमा गोली लागेर बाँया खुट्टा गुमाएका छन् र हाल उपचाररत छन्।

२ चैत, काठमाडौं । जेनजी आन्दोलनका घाइते मुकेश अवस्थीको दिदी आकृति अवस्थी सांसद बन्ने भएकी छिन् । उनलाई राष्ट्रिय स्वतन्त्र पार्टी (रास्वपा) ले समानुपातिक सांसदका लागि निर्वाचन आयोगमा सिफारिस गरेको छ ।

खस आर्यको नवौं नम्बरमा रहेकी उनलाई समानुपातिक सांसदको लागि रास्वपाले उनको नाम पनि निर्वाचन आयोगमा पठाएको हो ।

‘जेनजीले उठाएको भ्रष्टाचारको अन्त्य र सुशासन हो । जसरी उनीहरूले सडकबाट आवाज उठाए । उनीहरूको अभिभावक बनेर सदनमा आवाज उठाउने छु,’ उनले भनिन्, ‘जेनजी शहीद–घाइतेको अभिभावक बनेर काम गर्ने छु ।’

शिक्षा र स्वास्थ्यको मुद्दा पनि सदनमा उठाउने उनले अनलाइनखबरसँगको कुराकानीका क्रममा भनिन् । ‘पिछडिएको क्षेत्रमा नि:शुल्क स्वास्थ्य आवश्यक छ । शिक्षामा पनि एकरुपता बनाउनु पर्ने छ,’ उनले भनिन् ।

डडेल्धुरा अमरगढीका २२ वर्षीय मुकेश उनका जेठो भाइ हुन् । अहिले पनि मुकेश उपचाररत छन् ।

आन्दोलनमा गोली लागेर मुकेशले बाँया खुट्टा गुमाउनु परेको थियो । सब इन्जिनियरिङ सकाएका मुकेश अस्ट्रेलिया पढ्न जाने र फर्केर देशको सेवा गर्ने योजनामा थिए ।

तर गत भदौ २३ मा भएको आन्दोलनले उनको योजना रोकिएको थियो ।