महिला लिग छनोटमा राप्ती र नेपाल खेलकुद विजयी

१२ भदौ, काठमाडौँ । एन्फा महिला लिग छनोटमा राप्ती फुटबल क्लब र नेपाल खेलकुद फुटबल क्लबले बिहीबार जित हात पारेका छन् ।

ललितपुरको च्यासल स्टेडियममा भएको दिनको पहिलो खेलमा समूह ए को राप्तीले डिना नेपालीको दुई गोल मद्तमा एफसी रिएलेलाई ४-० ले हरायो ।

सरु हमालले खेलको छैटौं मिनेटमै गोल गर्दै राप्तीलाई अग्रता दिलाएकी थिइन् । दोस्रो हाफमा राप्तीले तीन गोल थप्यो । डीना नेपालले ५४ र ५७ औं मिनेटमा गोल गरिन् । यस्तै अनिशा राईले ५७ औं मिनेटमा गोल गरिन् ।

यस जितपछि चार खेलबाट ७ अंक जोडेर राप्ती समूह ए मा तेस्रो स्थानमा उक्लेको छ । पहिलो खेलमा आरएस रिसवर्ट एण्ड बीच फुटबल क्लबलसँग पराजित भएको राप्तीले त्यसयता सिन्धुपाल्चोक एफसीलाई पराजित गरेको थियो भने छहारी सँग गोलरहित बराबरी खेलेको थियो । चर्च ब्वाइज युनाइटेड ९ अंकसहित शीर्ष स्थानमा छ । यस्तै छहारी ७ अंकसहित दोस्रो स्थानमा छ । छहारीले तीन खेल मात्र खेलेको छ भने राप्ती भन्दा राम्रो गोल अन्तर छ ।

लगातार चौथो हार व्यहोरेको रिएले भने अंकविहिन अवस्थामा छ ।

यस्तै च्यासलमै भएको समूह बी को खेलमा नेपाल खेलकुदले बुटवल लुम्बिनीलाई ६–१ ले हरायो । छनोटमा नेपाल खेलकुदको यो लगातार दोस्रो जित हात पार्दा बुटवल लुम्बिनीको लगातार दोस्रो हार हो ।

नेपाल खेलकुदका लागि सुनिता सुनारले सातौं, दिलकुमारी मगरले १०औं, यशोधाकुमारी लिरालले १७ औं मिनेटमा गोल गर्दै २० मिनेटभित्रै ३-० को अग्रता दिलाएका थिए ।

बुटवल लुम्बिनीकी करणा राईले ५०औं मिनेटमा आत्मघाती गोल गरिन् । त्यसपछि नेपाल खेलकुदका लागि रविना गोलेले ५८औं र मन्जलीकुमारी योन्जनले ८० औं मिनेटमा गोल थपे । बुटवल लुम्बिनीका लागि ७९औं मिनेटमा विनिता कुमारी बोहरलो सान्त्वना गोल फर्काइन् ।

संकटा र एनआरटीसँग सुरुवाती खेलमा पराजित भएपनि नेपाल खेलकुद क्लबले त्यसयता उत्कृष्ट पुनरागमन गर्दै लगातार दुई खेल जितेर ६ अंक जोडेको छ । अघिल्लो खेलमा नेपाल खेलकुदले झापा एफसीलाई पराजित गरेको थियो ।

उता लम्की फुटबल क्लब एण्ड रिसर्च सेन्टर र नेपाल बेस्ट म्यानेजमेन्टलाई पराजित गर्दै सुरुवाती दुई खेल जितेको बुटवल लुम्बिनीले पछिल्लो खुई खेलमा हार व्यहवरेको छ ।

यसअघि बुटवल लुम्बिनी संकटा क्लबसँग पराजित भएको थियो । बुटवल लुम्बिनीको पनि समान ६ अंक नै छ ।

तस्बिर : एन्फा