हुम्लामा निर्मम यातना दिएर मारियो कुकुर, अनुसन्धान गर्दै प्रहरी

एउटा कुकुरलाई निर्मम यातना दिएर मारिएको वीभत्स भिडिओलाई लिएर सामाजिक सञ्जालमा प्रयोगकर्ताहरूले विरोध जनाइरहेका छन् । सामाजिक सञ्जालमा आइतबारदेखि भाइरल भइरहेको उक्त भिडियोले प्रयोगकर्ताहरूलाई आक्रोशित र स्तब्ध बनाएको हो ।

उक्भ भिडियो टिकटकमा ‘bibek.sunar790’ नामक ह्यान्डलबाट आइतबार बिहान १०:४८ बजे पहिलो पोस्ट भएको देखिन्छ । उक्त भिडिओमा एउटा असहाय कुकुरलाई डोरीको सहारामा डाँडाको ठूलो ढुंगबाट तल झुन्ड्याइएको छ । त्यतिमात्र नभएर माथिबाट निर्दयीपूर्वक ढुंगाहरू बर्साइएको छ ।

घटनाको क्रूरता यतिमा मात्र रोकिँदैन । त्यसको केही समयपछि सोही अकाउन्टबाट अर्को भिडिओ अपलोड गरिएको छ । जहाँ उक्त कुकुरको ज्यान गइसकेको देखिन्छ ।

पहिलो भिडिओमा एक विमानस्थलको पृष्ठभूमि र एक बालकको उपस्थिति प्रस्ट देखिन्छ भने पृष्ठभूमिमा ‘जन्म मृत्यु संसारकै रीत हो साथी आज अमर बनाइदेउ..’ बोलको गीत बजाएर घटनालाई उत्सव झैँ प्रस्तुत गरिएको छ ।

अनलाइनखबरले सोही आधारमा घटना कहाँ भएको हो भनेर खोजेको छ । जसआधारमा उक्त भिडियो बनाइएको स्थान हुम्लाको सिमकोट विमानस्थल आसपासकै क्षेत्र नजिक हो । त्यस्तै स्थान निश्चित गर्न हामीले स्थानीय मान्छेसँग पनि सम्पर्क गर्यौं । उनीहरूले पनि सो स्थान सिमकोट विमानस्थल नजिक रहेको निश्चित गरे ।

स्थान थाहा पाएपछि हामीले जिल्ला प्रहरी कार्यालय हुम्ला सिमकोटमा सम्पर्क गर्यौं । विमानस्थलनजिकै भएको यो घटनाबारे स्थानीय प्रशासन यो बेखबर रहेको देखियो ।

जिल्ला प्रहरी कार्यालय हुम्लाका प्रहरी सहायक निरीक्षक जङ्गबहादुर घर्तीले घटनाबारे आफूहरूले थाहा पाइसकेको बताए । अहिले प्रहरीले अनुसन्धान गरिरहेको उनले जानकारी दिए ।

यो सामग्री तयार पार्दासम्म कुकुरलाई निर्ममतापूर्वक सताइएको उक्त भिडियो १ लाख ६० हजार बढीले हेरिसकेका छन् । त्यस्तै ७०० बढी कमेन्ट आएका छन् । जसमा अधिकांशले दोषीलाई शक्त कारवाही गरिनु पर्ने बताइएको छ ।