१५ पुस, काठमाडौं । नयाँ बानेश्वरमा सरकारी गाडीमा आगलागी भएको छ भने अर्को एउटामा तोडफोड भएको छ ।
शुक्रबार दिउँसो बानेश्वरको अल्फाबिटा अगाडि बा २ झ १३९२ नम्बरको सरकारी स्कर्पियोमा आगजनी भएको हो । कसले आगो लगायो भन्ने खुलेको छैन । तर, सरकारी विदाका दिन चलाएको भन्दै गाडीमा आगजनी गरेको प्रत्यक्षदर्शीले बताए ।
अर्को एउटा सरकारी गाडीमा तोडफोड भएको छ । बा २ झ १०५५ नम्बरको गाडीको अगाडिको सिसा फुटाइएको छ । गाडी रोकेर तोडफोड गरेको चालकले बताए ।
जलाइएको गाडी वागमती सभ्यता एकीकृत समितिका किशोर शाक्यले प्रयोग गरेको खुलेको छ । सरकार गाडी चढेर उनी विदाका दिन नयाँ बानेश्वरको इन्द्रेणी फुडल्याण्डमा आएका थिए ।
त्यसैगरी तोडफोड गरिएको अर्को गाडी स्थानीय विकास मन्त्रालयको रहेको छ । सो गाडी मन्त्रालयका सहसचिव जीवन कुमार श्रेष्ठले प्रयोग गरेका थिए ।
त्यस्तै तोडफोड भएको अर्को रातो रंगको सरकारी गाडी सडक विभागको भएको खुलेको छ ।
सरकारी गाडीका चालक केदार लामिछानेले दिएको जानकारी अनुसार सरकारी विदाका दिन इन्द्रेणी फुडल्याण्डमा सडक बोर्डको वाषिर्कोत्सव आयोजना गरिएको थियो । सरकारी हाकिमहरु सोही कार्यक्रममा लागि सडकमा गाडी रोकेर होटेलमा छिरेका बेला अज्ञात व्यक्तिहरु आएर बिदाका दिन किन गाडी चलाएको भन्दै आगजनी र तोडफोड गरेर भागेका थिए ।
राजधानीमा यतिबेला बिदाका दिनसम्म सरकारी गाडीहरु निर्वाध रुपमा चल्दै र दुरुपयोगसमेत हुँदै आएका छन् । विगतमा विदाका दिन चल्ने सरकारी गाडीहरुको निगरानी प्रहरीले गर्दै आए पनि हिजोआज कसैले अनुगमन गर्ने गरेका छैनन् ।
