तिम्रै तारिफमा जन्मदिन

मन खिन्न,

छिन्नभिन्न हुँदा

पनि आँशु लुकाउन सिपालु

यी हजुरका आँखा

सधैं पर्खाल बनिरहुन्

ताकि तपाईंको दुःख कसैले देख्न नसकोस् ।

जन्मदिन मनाउँदा

घरबाट टाढा भई रमाउँदा,

कमाउँदाका बयानहरु,

बदलिउन् सधैंभरि

ताकि जीवनको नूतन स्वाद प्राप्त होस् घरिघरि ।

लकरबाट

पाँच, दश र बीसका नोटहरु

निकाल्दै चलेको यो जीवन

नोटहरुझैं दिनहरू

कहिल्यै मासिन नपरोस्

दिव्यताको बाटोमा ।

बसेर आलीको आँठोमा

समयसँग किनेका रत्नहरुको गाँठो

सधैंभरि बाठो बनोस्

कि कहिल्यै पाँच, दश, बीस का नोटसँग जीवन साट्न नपरोस् ।

बचपनमा खेलेका चुङ्गीहरूले

कहिल्यै नचुङ्गाउन

तपाईंको वर्तमानलाई

अनि भविष्यको चिन्ता

सकोस् जल्न  वर्तमानको चित्तामा

किनकि

जीवनको लामो बाटो हिंड्न

विगत र भविष्यका दुई लौराहरु आवश्यक हुने गर्दोरहेछ ।

हजुरको जीवनको खेल

केही कसैको जीवनसँग मेल नखाओस्

किनकि यदि मेल खायो भने

खेल सकिन्छ

यात्रा रोकिन्छ ।

बिहान ग्याँस चुलो बलेझैं

बिहानै उदाएको

यो हजुरको  सुन्दर जीवन

एक्कासी दुःखमा ननिभोस्

किनकि

यदि दु:खमा अग्नि निभ्यो भने

पिर पलाउँछ

जीवनको तापले हजुरलाई जलाउँछ ।

कलेजमा बनाएका बायोलोजीका चित्रहरू

चित्र बनाउन सघाउने मित्रहरू

सबैले हजुरलाई सघाउन्

सधैंभरि यसरी नै

चित्र र मित्रको उदाहरण मान्न सकिने गरी नै ।

बुबाको खल्तीबाट निस्किएको पैसाले

हजुरको जीवनका अज्ञानका गल्तीहरू सुधारुन्

यदि गल्ती सुध्रेन भने,

जीवनको मूल्य उध्रिन्छ

अनि गाह्रो पर्नेछ

हजुरलाई कमाउन र रमाउन

हजुरबारे लेख्दालेख्दै सकिएको यो मेरो कलम

अनि  हजुरको भावनाको मसीझैं

सधैंभरि गाँसियोस् हाम्रो सम्बन्धको रसि

बनी सधैभरि जस्तै लययुक्त  शशी ।

श्यामे हावाले

के लेख्छ के लेख्छ

के-के देख्छ के-के देख्छ

भनौली,

उसको देखाइ बत्तीमुनिको अँध्यारो बनोस्,

ताकि चम्काइको प्रकाशले

अनु भई चम्किली

हजुर तपाईंको प्रकाश

जताततै फैलियोस्,

हजुरको यश,

यही छ मेरो कामना

तिम्रै तारिफसँगै जन्मदिनको लाखौंलाख शुभकामना ॥