२०७९ पुष २८ गते ११:४८ 
२८ पुस, काठमाडौं । साउथह्याम्प्टनका प्रशिक्षक नाथान जोन्सले आफ्नो छोटो कार्यकालमा एक ठूलो जित हासिल गरेका छन् । उनको टिमले उपाधि दावेदार म्यानचेस्टर सिटीलाई पराजित गरी लिग कपको सेमिफाइनलमा स्थान बनाएको छ ।
लुटन टाउन आएयता जोन्स आफ्ना समर्थकको अनुहारमा खुसी ल्याउन संघर्षरत छन् । तर, प्रिमियर लिगमा संघर्ष गर्नपरे पनि उनीहरुले कपमा आफ्नो शानदार लयलाई पुनः प्रदर्शित गरेका छन् ।
साताको अन्तिममा ओल्ट ट्राफोटमा म्यानचेस्टर युनाइटेडसँगको खेललाई मध्यनजर गरी सिटीका प्रशिक्षक पेप ग्वार्डिओलाले आफ्ना प्रमुख खेलाडीहरु इर्लिङ हलान्ड र केभिन डी ब्रुयेनलाई आराम दिएका थिए । यति हुँदाहुँदै पनि साउथह्याम्प्टन आफैंमा गतिशील देखिएको थियो ।
यो खेल पहिलो हाफमा नै निर्णायक बनिसकेको थियो । २३औं मिनेटमा सेकोउ माराले टिमलाई अग्रता दिलाएका थिए । त्यसको पाँच मिनेटपछि मोउसा जेनेपोले लङ रेन्जमार्फत शानदार गोल गरे ।
ग्वार्डिओलाले दोस्रो हाफमा हलान्ड र ब्रुयेनलाई मैदान पठाए पनि साउथह्याम्पटन सेमिफाइनलमा पुग्ने दृढताका साथ आफ्नो अग्रतालाई बचाउन सफल रह्यो ।
प्रतिक्रिया 4